Shillong, Naiwieng, 10: U Bah Bindo M. Lanong uba long u nongïalam jong ka United Democratic Party (UDP) u la kren da kaba shai ba un ïakhun beit ïa ka elekshon sha ka Ingdorbar Thawaiñ ka ban sa long ha u snem 2023 na Nongkrem Constituency.
“Nga leit mynta sha Nongkrem namar haduh mynta ruh ym don u Candidate UDP, hadien ba la mih i Bah Ardent, namar wat ha ka ilekshon ba ladep 2018, ym shym don u UDP Candidate na kane ka Nongkrem Constituency. U (Bah Lambor Malngiang) ba ki la pynkhreh mynta, um ju don ha ka UDP bad um dei ruh wat tang u Associate MLA jong ka UDP, kumba long i Bah S.K.Sun bad u Samuel Sangma, baroh ar ngut ki Independent MLA. Kumta wat ïa pyrshang riam ïa nga na Malki-Laitumkhrah, nga la rai skhem ban ym kynriah na ka jaka kaba nga la ïaid la shisnem, ban ïaleh pyrshah ïa u Candidate UDP-bula jong i Kong Pretty bad kiwei ki nongïalam ba mynta,” ong u Bah Bindo ha u kyrwoh ba la phah sha ki lad pathai khubor.
Haba buh jingkylli ïa ka jingong jong ka Kong Pretty Kharpyngrope ba u la shna hi bad pynkheiñ hi ïa ki kyndon, u Bah Bindo u la ong, “i Kong Pretty bapli i bym pat da slem eh ha ka seng UDP, i la shu kren lymwir ha ki kot khubor , tang ban ïalam bakla ïa ki paidbah, hana ba nga shna hi ïa ki kyndon ha ka UDP bad mynta hana nga pynkhein hi. Tip ki kyndon aiu kita?
“Ngan da sngewnguh lada i kong Pretty Kharpyngrope, President ka Seng kynthei UDP in pynmih tang kawei ruh la biang, ïa kano-kano ka rai lane kata ka jingshna ïa ki kyndon ka UDP da ma nga marwei, ïa kaba nga pynkhein hi mynta,” u la ong.
“Ha ka UDP, la ju don bun ki Committee kiba ai jingmut ïa bun ki jait kam. Ym ju don ka Committee jong uwei u briew, uba lah ban shna hi marwei bad ban rai marwei, ha ki por ba la leit. I Kong Pretty iba la ju don teng ha ka MDP bad iba la ïaleh ïa ka election 2008 na Malki- Nongthymmai Constituency, nga nang mut ba i la tip ïa ki rukom trei kam ka Seng, phewse i kren lymwir bad i kwah eh ba ngam dei ban pynwit ha Nongkrem Constituency, hynrei ban leit ïaleh na Malki-Laitumkhrah, kaba nga la dep mad,” la ong shuh shuh u Bah Bindo.
