Ngam treh ban ïakynduh ïano ïano lane ïa u CM katba ngam pat ïoh ïa ka kaiphod tohkit : Bah Granary S. Thangkhiew

Shillong, Nailar 13: U Bah Granary Starfield Thangkhiew u para jong u Bah Cheristerfield Thangkhiew u la ïathuh ba ki don ki briew na ka liang jong ka Sorkar kiba la pyrshang ban pynbieit ïa u ba kum ka ïing ka sem kin sngap noh jar bad ban ym dawa ban pyllait paidbah ïa ka kaiphod tohkit ba la khlieh da u Justice T. Vaiphei ïa kaba ladep aiti sha ka Sorkar Jylla dang shen.
“Lada ka kaiphod tohkit kam ai jinghun, ma nga bad ka ïing ka sem ngin ym shong kli kti hynrei ngin shim da kiwei pat ki lynti,” ong u Bah Gray ha ka jingïakren bad ki lad pathai khubor hadien ba la kut ka jingleit buh syntiew ha u lum jingtep ha ka lyngkhuh sngi ïap ba shi snem jong u Bah Cherishtarfield Thangkhiew ha Lawmali ha ka sngi Saitjaiñ.
U la ong ba ka Sorkar kam dei ban pyrshang ban leh da kino kino ki buit ban pynslem ïa ka jingpyllait paidbah ïa ka kaiphod tohkit hynrei ka Sorkar dei ban sei madan noh mardor khnang ba ki paidbah ka Bri u Hynñiewtrep kin ym sah ha ka jingpisa mynsiem.
Haba kylli, u Bah Gray u la ïathuh ba bun ngut ki briew kiba la pyrshang ban pynbieit wat da ki sbai rupa ba kum ka ïing kin ym dawa sei madan ïa ka kaiphot.
“Hynrei katba ngam pat ïoh ïa ka hok na bynta u hymmen ngam treh kynduh ïa u Myntri Rangbah lane ïa u Myntri sorkar ne mano mano ruh watla ka don ka jingkwah kynduh na ka liang jong ki,” u la ong.
“Kumba ka long mynta kaei kaba nga ïakhun ka dei ba ka kaiphod tohkit ka dei ban pynmih paidbah noh bad katba ym pat mih ka kaiphod ngan ym shong kli kti. U Hymmen jong nga u ïeng na bynta ka jaidbynriew nga pat ngan ïeng na bynta ka hok u hymmen,” u la ong.
Shuh shuh u la ong ruh ba ka ïing ka sem ka ïai ap khmihlynti ïa ka kaiphod bad lada ka kaiphod kam ai jinghun na ka liang jong u ryngkat ka ïing ka sem kin leit tied ïa ka jingkhang jong ka Supreme Court, High Court ne wat sha ka National Human Rights Commission.
U la ïathuh ruh ba ki don ki katto kane kiba wan ban pynbieit da ki sbai rupa khnang ba un ym dawa shuh ïa ka Sorkar ban pyllait paidbah ïa ka kaiphod da kaba ong ruh ba un ïeng skhem beit trïohng ban dawa ïa ka hok na bynta u hymmen jong u.