Ngam ka surok ha jingkieng Mawlai By-Pass, maramot kyrkieh ka PWD

Shillong, Jymmang, 17: Ka jingther jong u lapbah uba jur naduh kine ki sngi ba la leit noh haduh mynta ka la buh jingma ïa ka jingkieng kaba pynïasnoh ïa ka surok Shillong-Mawlai By-pass hadien ba ka surok ka la ngam.
Kane ka jingkieng shwa ban poi ha Inter State Bus Terminus, ha Mawiongrim, ka dei kaba dang shu dep plie da u Myntri Rangbah ka Jylla u Conrad Kongkal Sangma ha u Nailar, 2019.
Ka jingngam jong kane ka surok ka dei na ka daw ka jingbym don jong ka nala ban pyntuid ïa ka um shabar jong ka jingkieng bad kaba la pynlong pat ïa ka surok ba kan ngam shapoh na ka daw ka jinglang ka um bad lehse kaba lah ruh ban twa ha kano kano ka por.
Kane ka la buh jingsyier bha ïa ki nongleit nongwan kiba ju pyndonkam ban ïaid lyngba ïa kane ka surok khnang ban lait na ka jingdheng kali sha surokbah National Highway.
Tang hadien katto katne por ïa ka surok Shillong-Mawlai By-pass la khang noh ban ïaid kali bad bun na ki nongleit nongwan kiba sah ha nongbah Shillong kiba thmu ban leit sha Ribhoi District bad kumjuh ruh ki kali kamai Tourist kiba thmu ban leit sha Assam ki la hap ban phai dien noh ynda la poi ha kane ka jingkieng kaba pynïasoh lyngba ka shnong Mawiongrim bad ka Mawkynroh bad don ruh ki kali Tourist kiba wan na Assam sha Shillong ki la hap ban phai dien da kaba ïaid noh na surokbah.
Ka jingkhang dam shipor ïa kane ka surok, ka long ban lait noh na kino kino ki jingjia basngewsih kaba lah ban jia ha kano kano ka khyllipmat.
Ha kaba ïadei bad kane, ka tnat PWD ka la maramot noh marmar ïa kane ka jingkieng bad khang shwa shipor ïa ka leit ka wan jong ki kali namarba ka rukom long jong ka jingkieng ka i synjor bad kam da i skhem satia.
Ki nongïalam jong ka KSU Mawlai Circle, kiba la hiar jurip ha kane ka sngi ki la kynnoh ba ka jingngam jong ka surok ka dei na ka jingtrei torti jong u Kontraktor uba pyntrei ïa kane ka surok.
“Kumba u Symbud Myntri Rangbah u Bah Prestone Tynsong u ong ba ka jingdon jong kane ka lynti kan pynlait ïaka jingdheng ha u surok National Highway bad kala long shisha hi ruh ka jing ïarap ïaki nongleit nongwan ba kin poi kloi sha ki jaka ba ki thmu ban leit, hynrei lyngba ka jingsniew noh kane ka jingkieng kan wanrah biang ka jingeh ïaki paidbah kiba ju pyndonkam ïa kane ka lynti thymmai,” la kynthoh ka Seng.
Ka Seng ka la dawa ïa ka tnad PWD ba kan maramot mardor ïa kane ka jingkieng bad kyntu ruh ba dei ban shna noh ïa ki nala ha ki rud surok khnang ba ka um kan tuid laitluid bad kan ym khlong ne pyn julor la ka dei ïa ka surok ne ïa ki jingkieng kiba don ha kane ka surok, ong u kyrwoh na u General Secretary ka KSU Mawlai Circle u Samla Rapborlang Nongrum.