Mawkyrwat, Nohprah 01: Ar ngut ki heprit kiba dei shipara trai ki la ngam jyllop ha kawei ka wah ha Laitkynja kaba jngai kumba 100 mitar na ka jaka sah jong ki katba ki dang ïaid kai bad ïalehkai harud jong ka wah.
Ki Pulit ki la ïathuh ba ki la ïoh jingtip na u Bah Ensiroy Wanniang na ka shnong Laitnong, South West Khasi Hills District ba ha ka 28 tarik, Naiwieng, 24 ha ka por kumba 1:00 baje mynsngi ar ngut ki khun jong u, kata, i heprit Sukkyrhai Lyngkhoi 5 snem ka rta bad i heprit Bashan Lyngkhoi 3 snem 3 bnai ki la ngam jyllop ha kawei ka wah ha Laitkynja.
Ïa kane ka jingjia la pyntip da iwei i heprit Lawanbiang Lyngkhoi, 5 snem ka rta iba la ïathuh ba uwei u khynnah shynrang u la hap shapoh um bad ka hymmen mar kumta ka la pyrshang ban ïarap sei ïa u para napoh um. Ine i heprit ba la sakhi i la leit mareh ban pyntip sha la ki kmie ki kpa shaphang ka jingjia bad ynda la poi ryngkat lang bad ki paidbah ki la ïoh ban sei noh ïa ka met jong ki ar ngut napoh um.
Ïa ka jingtohkit la bynshet ha u SI RH Koch bad ban pyndep ïa ki jingdonkam katkum ki kyndon jong ka aiñ.
