Ngam don eiei ban ong ïa kiba phet na ka NPP bad kwah ïakhun kyrtong shimet: Bah Prestone

Shillong, K’ Lyngkot 17: Ka jingmih ban ïakhun kum ki kyrtong shimet ha ki katto katne ki constituency ha kane ka elekshon MDC ka ban sa long ha ka 21 tarik u bnai Rymphang mynta u snem ka la pynlong ïa kiba bun ban pyrkhat halor ka jinglong jingman jong ka saiñ pyrthei ha kane ka jylla kaba la sdang ban kylla katba dang mih ki sngi.
Lah ban ong ba u MDC ka NPP napoh Mawlai Constituency u Bah Teiborlang Pathaw u la rai ba un ïakhun noh kum u kyrtong shimet ha kane ka elekshon ban wan da kaba ai daw ruh ba kane ka jingshim rai kadei kaba la kwah hi da ki paidbah kiba ju kyrshan ïa u.
Ha kaba ïadei bad kane ka rai jong ki katto katne ki MDC ka NPP ban ïakhun kum ki kyrtong shimet na ka liang u Bah Prestone Tynsong ha kawei ka liang u la ong, “Ngam don eiei ban ong. Kane ka ri synshar paidbah. Phi don baroh ka hok ban leh ïa kane. La phi kwah ban ïakhun na ka seng BJP ne la phi kwah ban ïakhun na kano kano ka party lane phi kwah ban ïakhun kum u kyrtong shimet naba ka riti synshar jong ka ri India ka shah kumta ngam don eiei ban ong halor kane. Ka shong ha ki. Ka shong ha ka jingkheiñ jong ki bad ngam don eiei ban ong halor kane.”
Lah ruh ban pynkynmaw ba ha Mawlai Constituency ki la don arngut ki kyrtong jong kiwei ki party kiba la rai ban ïakhun noh kum ki kyrtong shimet, kita kidei u Bah P T Sawkmie uba dei u dkhot jong ka United Democratic Party (UDP) bad u Bah Teiborlang Pathaw uba dei mynta u MDC jong ka seng NPP uba la rai ban ïakhun noh kum u kyrtong shimet ha kane ka elekshon MDC ka ban long ha ka 21 tarik u bnai Rymphang mynta u snem.