Shillong. Ïaïong 09: U MLA ba dang shujop biang jong ka Nongkrem u Bah Ardent M Basaïawmoit ha ka sngi Saitjaiñ u la pynpaw ïa ka jingsngewskhem ba kum u MLA u la wanrah ïa ka burom ïa ka constituency kaba la phah ïa u sha Assembly ban ïakren, ban ïatai bad ban ïasaid na ka bynta ka constituency bad ka jylla baroh kawei.
Haba kren kum u Kongsan ha ka prokram pynhap pyrda ïa ka jinglehkai phutbol ha Mawpynthaw u Bah Ardent u la ong ba baroh ki briew kiba wan sha kane ka pyrthei ki don kawei ka bynta kita ban wanrah burom ym tang ïalade hynrei na bynta kiwei ruh.
“Baroh ngi don ka bynta ban wanrah burom bad kane ka dei ban long ka ka thong jong manla uwei pa uwei uba im ha kane ka sla pyrthei, la ki nonglehkai phutbol ne ki nongpeitkai, la ki nongïakob ha ka jingpynbeit riam, ka jingïakob bha briew ne ki jingïakop ha ka shet ne kiwei kiwei ki jait kam ba ngi trei bad lada ngi bakla ha jaka ba ngin wanrah burom ngin wanrah pynban ïa ka jingjah burom ïa lade bad ïa ka ri bad ka jaidbynriew,” ong u Bah Ardent.
“Nga ngeit kum u MLA ka Nongkrem nga la wanrah ïa ka burom na ka bynta ka constituency da ki kam bad ki jingshimbynta ha ka dorbar bad kiba bun ki briew na bar jylla ki la kylli haba ki ïohi ïa ka dorbar ki kylli uei uto u MLA ba kren kumto ha ka dorbar bad nga ngeit ba kata ka la dei ka burom ïa ka Nongkrem kaba la phah ïa nga bad nga ngeit kane ka la dei ka burom kaba nga la wanrah,” u la bynrap.
U la ong ruh ba kum ka jaidbynriew kaba la ju ong kum ka jaidbynriew tip briew tipblei ‘ka dei ka kamram jong ngi ban phai khmat sha u Blei ïa ki kam kiba ngi leh ha ka jingim jong ngi lada dei ha ka jingeh bad ki jingtynjuh namar dei ma u ban ïarap ïa ngi’ ong u Bah Ardent.
