Nga la tip shaphang ki mat jingdawa kynthup ïa ka ILP, yn bishar hok ïa ki: ong u Lat ba thymmai ka jylla

Shillong, Naitung 30 : U Chandrasekhar H. Vijayashankar uba la long MP la arsien lynter na Mysuru bad kumjuh ruh kum u myntri sorkar, u la bam smai mynta ka sngi kum u Lat ba thymmai ka jylla. Mar ïa dep bam smai u la smai ruh ban ïatrei lang bad ka sorkar MDA ha kane ka jylla na ka bynta ban wanrah ïa ka roi ka par bad ka bha ka miat ka jylla. U la pynpaw ba u la tip ïa ki jingeh bad jingdawa ha ka jylla ba kynthup ïa ka Inner Line Permit (ILP) bad u la kular ba un bishar hok halor kine.
ïa ka jingpynbam smai ïa une u Lat ba thymmai ka jylla la pyndep da u Chief Justice ka ïing bishar High Court jongka jylla u S Vaidyanathan ha Raj Bhavan ha ka jingïadon lang u Myntri Rangbah ka jylla u Conrad K Sangma bad ki myntri sorkar, ki heh sorkar bad kiba bun ki ophisar.
Haba kren sha ki lad pathai khubor hadien ka jingbam smai kum u Lat ka jylla u la ong “ Ka long ka kabu bah ban ïoh shakri ïa ka jylla Meghalaya kum u Lat. Nga da sngewnguh eh ïa ka President ka ri ka Draupadi Murmu bad kumjuh ruh ia u Myntri Rangbah duh ka ri u Narendra Modi. Nga la shakri kum u MLA bad MP bad kum u myntri sorkar hynrei kane ka kyrdan kum u Lat ka long kaba khraw bad ka jingkitkhlieh kaba khia bha ha ki tyrpeng jong nga”.
U la ai khublei ruh ïa ki paid nognshong shnong ka jylla Meghalaya kiba buh hakhmat eh ïa ka jnglehkhuid bad khamtam kiba kwah beit ban don ka shongsuk shongsaiñ hapoh ka jylla. “ Kum u Lat ka jylla nga shaniah lut ïa baroh ym tang ïa ka sorkar bad ki ophisar hynrei ïa baroh namar ka thong ka long beit na ka bynta ka roi ka par. Ngam don kano kano ruh ka jingthmu ban myntoi shimet ngan ym leh hi ruh ïa kata bad ngan ym lah politik hi ruh. Ka President bad u Myntri Rangbah duh ki la phah ïa nga shane ban shakri ïa ka jylla kum u Lat bad kata ka dei ka kamram jong nga. Kum u Lat ïa kaei kaei kaba nga dei ban peit bad ban leh ngan leh ïa kata. Kiwei kiwei ki kam kim don jingïadei bad nga” ong u Vijayashankar.
U kwah ruh ba ki nong Meghalaya kin kynmaw ïa u kum u Lat uba hok bad uba kwah ïa ka roi ka par jongka jylla. “ Ki nong Meghalaya ki dei ban ïai kynmaw ïa nga kumne khnang ba nga ruh ngan lah ban pynlut por na ka bynta kane namar nga kwah ban shakri ïa ki paidbah” ong u Lat.
Haba pynpaw ïa ka jingsngewkmen ba ka NDA ka synshar ha Meghalaya u Vijayashankar u la ong “ Sa kawei nga kwah ban ïathuh ïa phi ba nga da sngew sarong ban ong hangne haba nga la rung nyngkong eh hapoh Parliament kum u dkhot jongka, u (L) Purno A Sangma u dei u Lamphang ka ïing dorbar Lok Sabha ha kato ka por bad mynta pat haba nga rung sha Meghalaya u khun jong u u Conrad K Sangma u dei u Myntri Rangbah.Nga la ithuh ithaw bad tip bha shaphang ka long ïing long sem jong ki khamtam eh haba ka sorkar NDA ka synshar hangne ruh nga buh ka jingshaniah ha baroh namar ngi kwah ban ïalam ïa ka sorkar kaba skhem bad ban buh hakhmat eh ïa ka jingmyntoi jongka jylla bad ki paid nongshong shnong jongka katba nga dang long kum u Lat ka jylla”.
“ Ngan ïatrei lang bad ki paid nongshong shnong ka jylla ryngkat bad ka jingshaniah ïa ki. Nga long uba pdiang lut ïa baroh kumta to ngin ïatrei lang naka bynta ka jingroi jingpar ka jylla” kyntu u Lat.
Haba la kylli hato un ïakren bad ka sorkar pdeng na ka bynta ban pyntreikam kloi ïa ka ILP ha ka jylla khnang ban khanglad na ka jingwan tuid ki mynder u Lat u la ong “ Na ka bynta ka jingtip ka jong phi nga ruh nga dei na kajuh ka jinglong jingman jongka imlang ka sahlang kumba phi la pynpaw, ym dei ban khuslai nga tip bha shaphang kine ki issue hangne. Mynshwa nga la wan sha Meghalaya kum u dkhot jongka Parliamentary Standing Committee on Railways, nga la wan la arsien sha kane ka jylla hynrei ngam pat ju ïakren ïa ki lad pathai khubor. Kane ka dei ka sien ba nyngkong eh ba nga ïakren bad ki lad pathai khubor. Nga tip ïa ki jingeh ne ki mat ha kane ka thaiñ bad ïa baroh kine ki mat ngin pyrshang ban bishar hok ïa ki” Pynkut u Lat.