Nongpoh, Naitung 24: Ka Dr. Saralin Dorphang kaba dei ka khun ba 3 jong u Bah PW Muktieh u ba dei u MLA bad MDC barim ka Mawhati Constituency kala rai ban mih shakhmat ban ïakhun haka elekshon 2023 hadien ba ka party TMC kala pynbna syndon ïaka kum ka kyrtong na Mawhati.
“Ngam lah shuh ban shu peit tang da ka ki khmat ïaka jingjynjar jong ki paidbah, nga ieh ïaka kam Doctor kaba nga la shakri mynta la kumba 18 snem haki hospital sorkar kaba ngala shakri ruh ïaka Mawhati PHC bad Umtrai PHC, namar nga don ka jingangnud ban pynkylla ïaka jinglong jingman jong ka Mawhati Constituency kaba la shu shah ieh khunswet bad shah leh beiñ shaba palat, ka mynsiem jong nga kam shah shuh ban shakri tang kum ka doctor, hynrei ban sumar ïaka jingpang sahdien jong ka constituency baroh kawei” ong ka Dr Saralin khnang ba yn lah ban pynim bad buddien biang sa shisien ïaki matti jong u kpa u ba dei ruh u myntri barim haka sorkar haka por ka jingsynshar jong ka Congress.
Kala ong ruh ba ka Mawhati Constituency ka dei kaba sahdien tam haba phai sha baroh ki liang naduh ka roi ka par, ka pule puthi, ki skul ki college, ki jaka sumar bad kiwei kiwei namar la shu jied ïaki nongmihkhmat kiba kyllut ki skhor bad kiba matlah ki khmat, bad dei ha kane ka kynti da ka mynsiem kaba rhem ngala rai ban mih shakhmat ban ïakhun naka party TMC kabym pat don kano kano ka dak thoh bria haka jylla, kaba don ka nongrim kaba biang ban shakri ïaki paidbah bad kaba dang lah ban shaniah bad shngaiñ.
Naka liang ka Dr. Saralin Dorphang kala buh ka jingkyrpad sha ki paidbah ban snohkti lang sha ka party naka bynta ki jingkylla ban kyrshan ïaka ha kane ka elekshon ban wan na Mawhati Constituency, namar ki paidbah ki dei ban kyndit bynriew noh bad ngim kwah ba ka jingbabe kan wan biang sa shisien lada ngi bakla ban jied ïaki nongmihkhmat.
