NEP-2020: Rai u VC ka NEHU ban khot ïa ka jingïalang kyrkieh jong ka Academic Council

Shillong, Nailar, 01: U Vice Chancellor jong ka skulbah North Eastern Hill University (NEHU) u Prof. PS Shukla u la kular ban khot da ka jingïalang ba kyrkieh jong ka Academic Council hadien ba ka North Eastern Hill University Students’ Union (NEHUSU) bad ka Hynñiewtrep Youths Council (HYC) ki la pan jingpynshai ha kaba ïadei bad ka jingpyrshah jong ki nonghikai kolej ban pyntreikam ïa ka National Education Policy (NEP) naduh ka 1 tarik, Nailar, 2023.
Ha ka jingïakren bad ki lad pathai khubor, u President ka HYC u Bah Robertjune Kharjahrin u la ïathuh ba u la buh ka jingkylli hakhmat u Vice Chancellor ka NEHU hato ki Kolej kiba la ïoh jingithuh na ka NEHu ki lah neem ban pyntreikam ïa ka NEP-2020.
“Ngi la pan jingpynshai ruh hato ka University ka lah neem ban ai jingkyrshan ha ka pule puthi ha ki Kolej,” ong u Bah Kharjahrin bad bynrap, “ki don ki samla pule kiba ladep siew ïa ka bai pule, hato kan don neem ka jingjied hi jong ki katkum ka Syllabus kaba rim. Hato kan don neem ka jingkylla ha ka mon ba ki jied bad kan don neem ka jingpynbor ïa ki Kolej ban pynbiang ïa ki jingdonkam baroh. Lada ki hap pynbiang, mano ban siew ïa kita? Ha kaba kut, kin hap ban siew hi ki samla ple bad kan don ka jingktah ïa ki kmie ki kpa bad ïa ki bahaing hasem kiba kyrshan.”
“Ngi la kylli ruh (ïa u Vice Chancellor), la ki la biang neem ïa ki Study Material na kabynta ki nonghikai bad ki samla pule,”la ïathuh u Bah Kharjahrin.
“Balei ka Academic Council kam shym la shim ïa ka rai ban pyntreikam noh mynta ïa ka NEP? Ngi la kren shai ba tang ka Executive Council ka lah neem ban shim ïa ka rai? ula buh jingkylli.
“Lada peit ïa ka Statue bad ka Ordinance jong ka NEHU ka kren shai ba ïa ki polisi treikam jong ka NEHU yn hap ban shim rai da ka Academic Council bad ban pyntreikam pat da ka Executive Council. Ha ka jingsngewthuh jong ngi, kat haduh ban pyntreikam ïa ka NEP dei ban shim rai da ka Academic Council,” u la bynrap.
“Na ka liang jong ka NEHUSU bad ka HYC ngi la pan jingpynshai na u Vice Chancellor ban shim ïa ka jingkithlieh ban pynbeit ïa ki kynrum kynram ba la mih ha kine ki taiew. Ngi la dawa ruh ban khot ïa ka Emergency Meeting jong ka Academic Council ba baroh ki Principal, ki ophisar jong ka tnat pule puthi ka Sorkar Jylla, ki nongmihhmat na ka MeTTA, MCTA bad ki kynhun sengbhalang bapher bapher ban ïathir ïatai khnang ba kan ym ktah ïa ka lawei pule jong ki samla”
“Ngim kwah ban ïohi ba ki samla kin pep noh tang shiteng por ki jingpule tang na ka daw ba kim lah ban siew ïa ka bai Kolej. Lada ki Kolej ki hap ban thung ïa ki nonghikai bad ki nongtrei kin hap ban pynkiew ïa ka bai pule Kolej,” u la ong.