Shillong, Naiwieng 11 : Ka Meghalaya, Manipur, Mizoram bad ka Nagaland kin sa ïaknieh rung phainal ha ka lympung ïalehkai 2nd North East Olympic Games 2022, ha ka jingïakhun semi phainal kaban long ha ka sngi U Blei ha madan Third Ground, Polo, Shillong.
Ka Meghalaya ka la bat kyrdan ba nyngkong na ka Group 2 bad kan sa ïakhun pyrshah ïa ka Manipur ha ka semi phainal ha ka sngi U Blei.
Ka Mizoram ka la pynliem da 1-0 kol pyrshah ïa ka Manipur ha ka jingïalehkai ha MFA Turf ha Polo Ground hynne ka janmiet sngi Thohdieng bad pyndep bat kyrdan ba nyngkong na ka Group 1. Ka Mizoram ka la khur jingjop lyngba ka kol ba la thep da u Rohlupuia ha ka minit ba 50 ha ka jingïakhun ba la wan sakhi da ki spah ngut ki nongkyrshan na baroh ar tylli ki team. Kumta ka Mizoram kan aireng pyrshah ïa ka Nagaland ha ka semifinal.
Ka Nagaland ka la rem da 2-1 kol ha ka Meghalaya ha ka jingïalehkai ba nyngkong. U Wadajied Kynsai Ryngkhlem u la pynkhih jar nyngkong na bynta ka Meghalaya ha ka minit ba 29 shwa ba u Everbrightson Mylliempdah u la thep ïa ka kol kaba ar ha ka minit ba 62 jong ka kylla miet. Ka Nagaland ka la thep ïa ka shi kol ha ka minit ba 88 hynrei ka Meghalaya ka la lah ban kyrda haduh ba kan da khur jingjop.
Baroh saw tylli ki team ki la dep rung lypa sha ka semifinal hynrei la pynïalehkai tang na bynta ban ïoh bat kyrdan ba hakhlieh.
Ka Mizoram bad ka Nagaland kin ïakhun nyngkong ha ka semifinal ha ka por 11 baje mynstep ha ka sngi U Blei, bud pat sa ka Meghalaya bad Manipur ha ka por 4:30 baje janmiet. La shah sngewbha ïa baroh ki paidbah nongpeit kai hynrei kat kiba kloi kin ïoh ban rung shapoh.
Ha kawei pat ka liang, ka Sikkim ka la ïoh bat kyrdan ba lai na ka Group 2 hadien ba ka la pynliem da 5-3 kol pyrshah ïa ka Arunachal Pradesh.
Ka Arunachal Pradesh ka la lamkhmat ïa ka jingïalehkai lyngba ki lai kol ba la thep da u Pungte Lapung (1, 23 min) bad u Bengia Bosco (68 min) hynrei ka Sikkim ka la lah ban pynphai ïa ki san kol ba la thep da u Sahil Chettry (10 min), Rohit Gurung (42 min), Pravin Rai (82 min) bad u Crisnawag Sherpa (86, 90 min).
Lashai ka sngi Saitjaiñ ka jingïalehkai group stage ba khatduh jong ki U-17 jong ki kynthei, ha kaba ka Meghalaya kan ïakhun pyrshah ïa ka Arunachal Pradesh na ka Group 2 ha ka por 11 bae mynstep bad ka Sikkim pyrshah ïa ka Assam ha ka por 3:30 baje janmiet kaba dei na ka Group 1.
