Nang ring sdot ka jingpyntreikam skhim 100 sngi bym pyllait pisa ka sorkar

Shillong, Nailar 10: Ka jingbym pyllait thikna ka sorkar ïa ka pisa jong ka skhim MNREGS, ka la nang pynring swai bad ring sdot ha kaba bun ki Shnong ki la pynpaw ka jingeh kaba khraw ban pyntreikam ïa ki Projek lyngba kane ka skhim kaba wan lyngba ki Community and Rural Development Block.
Ka Seng HYC hadien ba la ïoh ïa ka jingujor na kiba bun tylli ki VEC na ki Shnong bapher bapher mynta ka sngi, ka la leit ban ujor sha u Myntri ka tnad C&RD, u Abu Taher Mondal ban pynpaw lem ïa kane ka jingeh ki Shnong.
Ha ka jingshisha ka MNREGS kadei ka skhim kaba la pynkylla dur ïa ki Shnong sha nongkyndong, namar lyngba kane ka skhim, ki briew ym tang ba ki ïoh kam bylla, hynrei ki kam pynroi ha Shnong, kum ki surok, ki lynti ïaid briew, ki jingkieng, ki pung um, kimadan Phutbol la ïoh ban shna ha ki shnong ki thaw.
Na ka liang u General Secretary ka HYC, u Bah Roykupar Synrem haba kren sha ki ladpathai khubor hadien ba ladep ai ïa ka jingthoh sha u Mondal, u la ong ba ka  jing pyntreikam ïa kane ka scheme ka wanrah ka jing myntoi  shibun ïa ki paidbah hynrei ka jing pynslem ka sorkar pat ban siew ïa ka pisa bai bylla bad khamtam eh ïa ka bai tiar bai tar ne kata ka bai material ba ki ju ong, ka la wanrah ka jingeh ïa ki paidbah bad ïa ka shnong hi baroh kawei. Na ka liang ka Seng ka dawa na u Myntri ba u donkam ban shimkhia halor katei ka mat, bad ka sorkar meghalaya ka donkam ban thaw ïa ki lad ki lynti ban ïaleh ban pyllait kloi ïa ka pisa ba ka ïoh na ka sorkar pdeng, namar ba ka skhim MNREGS kadei ka skhim ba la bei tyngka da ka sorkar pdeng.
Hynrei la iathuh pat ba na ka liang u Myntri u la ong ba ka long ka ba eh ïa ka sorkar namar kane ka scheme ka dei na ka Sorkar pdeng. Hynrei u ong wat la katta ruh na ka liang jong u, un sa pyrshang ban shimkhia halor kane ka bynta.
Shuh shuh na ka liang ka Seng ka la kyntu ïa u Myntri ba lah donkam ban don noh ka jingïateh bad ka MLA Scheme kumba 50% bad ka scheme MGNREGS namar ba bun hi ka MLA scheme ka leit beit tang sha ki briew kiba u MLA u mon, hynrei lada lah ban don ka jingteh ban sam lang ïa ka MLA Scheme bad ka MGNREGS kan pynmyntoi shibun ïa ki paidbah.
Na ka liang u Mondal, haba ïakren bad ki nongthoh khubor, u la ïathuh ba ka sorkar dang ha kane ka taïew baladep, ka la pyllait 50% ka pisa kaba dei jong ka snem 2022 jong ka MNREGS. U la ïathuh ruh ba ka sorkar kan shimkhia ban ïakren bad ka sorkar ban pyllait noh sa ïa ka 50% kaba dang sah. U la ïathuh ruh ba ka long kaba eh ba pynhun ïa ki paidbah, namar kane ka skhim ka long 75% na ka sorkar pdeng bad 25% na ka sorkar jylla.