Nongstoiñ, Ïaïong 17: Ka Garoland State Movement Committee ka kynhun kaba dawa ban phiah noh ïa ka Meghalaya ha ki ar tylli ki jylla, kata ban pynïakhlad noh la ka jong ïa ka Garo Hills Hills ka la nang pynkhlaiñ shuh shuh ïa ka jingdawa da kaba pynlong ïki jingïalang paitbah haman la ki jaka hapoh ka District.
Katei ka kynhun kaba la ïalam da u bah Nickman Marak ka la ïoh ruh ïa ka jingkyrshan ba pura na baroh ki sengbhalang jong ka rilum ba kynthup ïa ka Garo Student Union, Ka Mother’s Union of Garo Hills, ka Achick Holistic Awakening Movement bad kiwei kiwei.
Kum shi bynta ban nang pynkhlaiñ shuh shuh ïa katei ka jingdawa bad ban pynshai sha ki paitbah ba ka Garo Hills, ba ka la donkam ban ïoh noh la ka jong ka jylla, mynta ka sngi ka GSMC, ka la pynlong ïa ka jingïalang paitbah ryngkat ka jingïaid proseshon ha Williamnagar ka Headquarter jong ka East Garo Hills, ha kaba da ki hajar ki paitbah ki la wan ban ïashim bynta.
Ha kaba ïadei bad katei ka jingïalang paitbah u bah Nickman Marak Chairman ka GSMC haba ïakren bad u nongthoh khubor, u la ong ba ka jingpynlong ïa katei ka jingïalang ka la long kaba sei soh, namar baroh ki sengbhalang bad ki paitbah nongshong shnong na kylleng ki jaka ki la wan ban ïa shim bynta bad ki la pynpaw ba ki la kwah eh ban ïoh noh la ka jong ka jylla.
U bah Nickman u la ong ruh ba ha katei ka sngi baroh kiba la wan ban ïa shim bynta ha katei ka proseshon, ki la ïakut ba dei ban phah da ka jingthoh sha ka sorkar MDA II, ban dawa ba ka dei ban pass noh da ka resolution hapoh ka ïing dorbar bad ban soi lang da baroh hynriew phewngut ki MLA, ban phah sha ka Ministry of Home Affair jong ka sorkar pdeng ba ka dei ban leh ïa kaba donkam.
Nalor kata u bah Justine Marak Secrtary ka GSMC u ba dei ruh u CEM barim ka Garo Hills Autonomous District Council, u la ong ba ka jingdawa ïa ka Garoland kam dei shuh ka jingdawa kaba thymmai. Hynrei kaba la dawa la slem bha bad ka jingsdang ban pynkhlaiñ biang ïa katei ka jingdawa, ka dei hadien ba ki Nongïalam ba hakhmat jong ka National Federation of New State (NFNS) ba la ïalam da u Professor Munish Tamang bad kiwei kiwei, ki la wan ban pynshai ha ka jingïalang paitbah kaba la long ha madan Teteng Ajaa ha Tura ha ka 30 tarik Risaw jong u snem ba la dep bad lyngba ka jingwan pynshai jong ki ba ka jingkhihwin jong ki paitbah Garo ka la sdang bad ka la pur sted bha haduh ki jaka kyndong kynshrot baroh.
U la ong ba ka jingdawa jong ki paitbah na Khasi Jaiñtia ban pyntreikam ïa ka Roster System ha ka thungkam thungjam ka la nang pynkhihwin shuh shuh ïa ki paitbah Garo. U bah Marak u la ong ruh ba ka sorkar jylla ka la dei ban shimkhia bha ïa kane ka mat, lada ka kwah ba ki paitbah Khasi Jaiñtia bad Garo kin ïa im suk im saiñ bad ba kan ym don kano kano ka jingsngewïapher jaitbynriew, khamtam eh ha ka thung kam thung jam, ka ktien ka thylliej bad ka imlang sahlang.
U la ong ba ki nongïalam jong ka KHADC bad JHADC ki la dei ban phaikhmat sha katei ka bynta bad ki la dei ban pynsngew sha ka sorkar jylla, namar dei tang ka jingïakhlad paralok noh ka ba lah ban weng ïa ki jingeh ha baroh ki liang la la long ïa ki Garo ne ïa ki Khasi Jaiñtia.
U la kyntu ruh ïa ki nongïalam jong ka HSPDP kawei na ki party trai ri kaba la ithuh bad pynrung da ka NFNS kum ka dkhot ba thymmai, ka dei ban shimkhia bha halor kane namar kiwei ki party kum ka UDP, PDF, VPP, kim kwah satia ban kren ei ei halor katei ka mat bad ki National Party lei lei kin ym kwah wat ban ïohnsgew ïa katei ka jingdawa.
