Nongpoh, Nailar 17: Kum ba ha kine ki khyndiat taiew la don ki nongshong shnong kiba la ioh ïa ka jingpang khmat ha Ri Bhoi ha kaba ki dak ki shin ka dei ka jingsaw ka khmat bad kane ka jingpang ka la dang pur ha kylleng ka them Ri Bhoi ha kaba bun na kito kiba ngat ïa kane ka jingpang ki hap ban deng da ki ïitkhmat ïong.
Kumba la ioh lum jingtip da u Mawphor, kane ka jingpang ka ktah naduh ki rangbah bad haduh ki khyllung ki khynnah ha kaba bun na ki skul kim shah ïa ki khynnah kiba ngat ïa kane ka jingpang ban wan sha ki skul, namar ka jingsheptieng ba ioh kane ka jingpang khmat ka pur sha kiweu pat ki khynnah,
La ioh jingtip ruh la don ki skul kba la ai shuti ïa ki khynnah rit, kaba dei hadien ba ka jingpur sted kane ka jingpang khmat, ba kito kiba ioh ïa kane ka jingpang ki saw ki khmat bad daitbuit ki khmat.
Kane ka jingpang khmat lah ban tip ruh kum kata ka jingpang Epidemic Keratoconjunctivitis ha ka ktien Phareng bad kane ka jingpang ka don ïa ki dak ki shin ba daitbuit ki khmat bad saw lut ki khmat baroh arliang.
Halor kane ka jingpur kane ka jingpang khmat, kito kiba ngat ïa kane ka jingpang khmat ki hap ban deng da ka ïitkhmat ïong bad wat kito kiba ym pat ngat ruh ki la pyrshang ban deng da ki ïit khmat ïong ba ki sheptieng bai oh ka bit na kito kiba la ngat ha kane ka jignpang khmat.
Shuh shuh, kum ba paw shabar ne ki dak ki shin kane ka jingpang haba sakhi na kito kiba la ioh ïa kane ka jingpang ka dei ka jingpang kaba baroh ki shemtieng, namar tang shu peit markhmat la ong ba ka lah ban bit sha kiwei ruh kiba ym pat ioh ïa kane ka jingpang ha kaba bun ki la sdang ban phikir namar ioh kane ka jingpang ka lah ban sar ha kylleng ka them Ri Bhoi.
Kumba long haduh mynta kam pat don kano kano ka jingai jingmut na ka tnad ka koit ka khiah ne na ka bor synshar District sha ki paidbah kiei ki lad ban ïada ban lait na kane ka jingpang khmat bad kaba buh jingeh ka dei khamtam na ka bynta ki khynnah skul, namar kane ka jingpang khmat ka la sdang ban sar kylleng ki jaka khamtam ïa ki khynnah skul bad wat ki riew paidbah.
