Nongstoiñ, Naiwieng 11: Ha ki phew snem ba la leit noh ka West Khasi Hills ka dei ka District kaba la bna nam ha ka jingdon jong ki khlaw ki btap, ki mrad ki mreng ki sim ki doh, ki kynbat dawai ba laiphew jait. Hynrei katba nang mih ki sngi, ki khlaw ki la nanglut, ki mrad ki mreng ki la nang duh jait, ki sim ki doh ki la nang sakma, ki kynbat dawai ki la nang jah rngai namar ka jingbym kheiñ kor jong ki nongshong shnong kata naduh ki trai jaka haduh ki bym dei trai jaka ruh.
Ha kaba ïa dei bad kane u bah P.Nongsiej uwei na ki riew rangbah na West Khasi Hills haba ïakren bad u nongthoh khubor, u la ong ba ka long kaba eh haduh katta katta ban pynsngewthuh ïa ki nongshong shnong ba kin kiar na ka jingpom pathar ïa ki khlaw ki btap, namar ka dei ka jaka jong ki kumta ki leh katba mon. U la ong ruh ba ki don wat kiba jubab ba lada kin sangeh ban pom ïa ki khlaw da ei kin bsa ïa ki khun ki kti.
U la ong ba ka jingpom pathar ïa ki khlaw ka don bun jait kum ka jingpom shyrti lane shift cultivation kumba ju leh ha ki thaiñ Lyngngam, ka jingpom dieng supply bad ka jingthang rnga. Ki la ong ruh ba ka jingpom shyrti bad pom dieng supply kam da ktah than haduh katta katta, namar tang hadien katto katne snem ka la ong khlaw biang.
Hynrei ha kine ki snem pat shisien ba la pom dieng supply ki pynkhyllem naphang bad dieng rit bad dieng heh, namar ïa ki bym pat long ban supply ki thang rnga noh ryngkat bad ki tnad jong ki dieng kiba la long ban supply. Ki la ong ruh ba dei na kata ka daw ba ki trai khlaw kim kheiñ kor shuh ïa ka mariang namar lada die ïa ki khlaw ka pisa ka lah bun bha.
U la ong ruh ba don napdeng ki nongshong shnong kiba dei ki briew kiba don ba em, hynrei na ka daw jong ka jingrhah spah kim pyrkhat satia ba lada die noh ïa ki khlaw, kumta ka jingma ka ap namar ki wah kin nang rit ka jingshit kan nangkiew man la u snem. Kumta ka sorkar lyngba ki nongmihkhmat paidbah ki la dei ban kyndit bynriew ban thaw ki aiñ kiba pyrkhing bha ban khanglad ïa ka jingpynsynlen ïa ki khlaw.
