Nang jur ka jingdawa ban pynduh noh ïa ka aiñ ïakhalai, mynta yn hiar ki 2 Seng sha Ri Bhoi

Shillong, Nailur 21: Wat lada u Myntri Rangbah, u Conrad Sangma, u ladep ban pynbna ba ka sorkar kan sangeh shuwa ïa ka jingthmu ban plie ïa ki Casino ha jylla, hynrei kiba bun hi ki sngew ba kane kam pat biang bad donkam ban pynduh pyndam syndon ïa ka aiñ ïakhalai 2021.
Ka Seng Hynñiewtrep Integrated Territorial Organisation (HITO) RiBhoi District ha ka 22 tarik mynta u bnai kan pynlong ïa ka rally ha Ri Bhoi District ban pyrshah ïa ka jingwanrah ïa ki kam ïakhalai ha ka jylla lyngba ki Casino.
Ka Seng kan dawa ruh ban pynduh pyndam noh syndon ïa ka aiñ Meghalaya Regulation of Gaming Ordinances 2021.
Kane ka rally kan sdang na Lad Umsaw bad ki dkhot ka Seng kin ïaid da ki kali haduh ka ophis jong u Syiem Raid Marwet ha Khanapara.
Nangta ka Sur ka Bri u Hynñiewtrep ruh kan kan pynlong ka jingïakhih hakhmat ka ophis jong u Syiem ka Raid Marwet naduh ka por 11 baje mynstep ban dawa ban pynduh pyndam noh syndon ïa ka Meghalaya Regulation of Gaming Ordinances 2021.
Na ka liang ka Meghalaya United Christian Forum (MUCF) ruh ka la dawa na ka sorkar jylla ba kan pynduh pyndam noh ïa kane ka aiñ ba la wanrah da ka sorkar MDA ha u snem 2021.
Kane ka kynhun ki Balang Khristan, ha ka kyrwoh ba la phah mynta ka sngi da u Chairman, u Rev. Batkupar Dunai bad u Prof. Synsharlang Kharshiing, Secretary, ka la pynpaw ka jingsngewkmen ba ka Sorkar ka la rai ban pynsangeh shuwa ïa ka jingai laisen ban pynlong ïa ki kam khalai lyngba ki Casino, hynrei ka dawa pat ban pynduh noh syndon ïa ka aiñ, namar ba ka sngew ba ki jingtreikam kiba kum kine ki wanrah ïa ka jinghiar dor ka long briew man briew.
Lah ban kdew hangne ba ka Seng HYC hynnin ka sngi ruh ka la dawa ban pynduh noh ïa kane ka aiñ hadien ba ka la lap ba ka jingkren jong ki heh sorkar bad ka kam kim ïadei satia. Ka Seng ka ong ba katkum ka jubab u James Sangma ha ïingdordar Thaw aiñ, la pyntip ba lah dep ban ai ïa 3 tylli ki Licence sha ki riew shimet ne ki kompeni bad kumjuh ruh ba ka Sorkar ka lahdep ban thung ïa u Chairman bad ki dkhot jong ka Gaming Commission.
Hadien kane u Conrad Sangma u lah pyntip hapoh ka ïingdorbar Thawaiñ bad lyngba ki lad pathai khubor ba ka Sorkar naduh u bnai Jymmang mynta ka snem ka la pynsangeh noh ïa kano kano kam ba ïadei bad ki jaka ïa khalai hadien ba lah mih ki jingpyrshah kiba bun.
Ka HYC ka ong ba kane ka jingkren jong u Conrad Sangma kam ïahap satia bad ka jubab kaba ka Seng ka la ïoh lyngba ka RTI na ka ophis u Commissioner of Taxes lyngba ka shithi No.CTA-26/2009/Pt-VI/58 dated Shillong, the 17th August, 2022 namar katkum ka jubab kaba la ïoh ka kren shai ba ka Department ka dang ïaid shakhmat ban peit bad bishar ïa ki aplikeshon na bynta ki kam khalai katkum ka Act bad ka Rules. Kaba mut ba haduh u Nailar, 2022 ka Department ka dang bishar ïa ki aplikeshon. “Haba kumta ngin ngeit ïano, ïa u Conrad Sangma ne ia ka ophis u Commissioner Taxes?”, la ong ka HYC.
Ka HYC, u ong ruh ba ka jingkren jong u Conrad bad ka Sorkar ba yn nym shah ia ki trai ka Jylla ban leit rung sha ki jaka ia khalai ruh ka long ka ei kaei kaba shu pyndep rukom namar ha ka Rule 18(b)(x) lah shu thoh ba kan dei ka kamram jong ki Nongpyniaid ïa ki Jaka ia khalai ban buh ïa ki Notis ha kita ki jaka ba yn shah tang ïa ki briew kiba na bar jylla ban ïa khalai. Ym don kano kano ka kyndon ka ban ai bor lane ban buh ïa ki bor sorkar kum ki pulit ha kine ki jaka na ka bynta kane. Wat lada u Conrad u ong ba ki pulit ki lah ban check bad pyntikna ba ki trai jylla kin nym rung ha kine ki jaka, na ka liang ka Seng ngi sngew ban pynpaw ba ïoh lehse kane kan dei pynban ka kabu ïa kito ki Pulit kiba mlien ka ban kamai bamsap ban ïoh kit pisa na kum kine ki jaka. Ka jingai bor ha ki Nongpynïaid ban pyntikna ïa ki nongwan ïakhalai la kidei ki bar jylla ne ki trai jylla ka long kamkai namar kat nang wan ki briew ban ïa khalai katta ka jingïoh nong ka jong ki. Te kumno ngin mutdur ba kin ïa pyntreikam da kine ki Licencee hi ia kaba kum kane ka Kyndon.
Lehse ki Trai Jylla ki lah ban shah khang ha ki kam Khalai hynrei ki lah pat ban leh ïa kiwei kiwei ki kam sniew ha kiba kum kine ki jaka la ka long ki droks bad ki kam awria. Kumno yn pyntikna pat ba kum kine ki kam kin nym ïoh ban leh da ki Trai Jylla ha kine ki ktem ïa khalai.
Namarkata ka daw, ka Seng ka dawa ba dei ban Repeal ne pyndam noh ïa ka Act bad Rules mardor, nangta dei ban weng noh ïa u Chairman bad ki Member ka Gaming Commission, khnang ba kan nym sepei ka pisa paidbah ban siew tulop ïa ki bad kumjuh ruh ban weng noh mardor ia ki 3 tylli ki License kiba lah ai da ka Sorkar.