Shillong, Nailur 02 : Ka Mawlai Sports Club kala nang jan sha ka thong lahduh jong ka Shillong Premier League 2021-22 hadien ba ka la jop biang da kaba pynliem ïa ka Mawkhar Sports Club da ka 3-0 ha ka jingïalehkai kaba la ïaid 44 sien jong katei ka lympung ha ka sngi Thohdieng ha madan Third Ground, Polo, Shillong.
Da kane ka jingjop ka Mawlai SC (29 poiñ) kaba don hakhlieh duh na ka miej ïakheiñ poiñ ka la tam da 8 poiñ ïa ka Langsning FC (21 poiñ) kaba don mynta ha ka kyrdan ba ar.
Ka Mawkhar SC ha ka jingïalehkai kaba la long ha ka 20 tarik Naitung ka la ïakhaid khlem da ïoh ban ïathep kol bad ka Mawlai SC.
Watla ka Mawlai ka khlem lah ban thep kol ha baroh ki 90 minit ha ka jingïalehkai jong ka 1st leg ne ka kylla ba nyngkong ïa ka Mawkhar, hynrei ha ka kylla kaba ar ka khlem ailad shuh ha kaba ka la ïoh ban pynliem syndon.
Haba phai sha ka jingïakhun ha ka sngi Thohdieng hapdeng kitei ki ar tylli ki team, ka Mawlai SC ka la ïoh ban plie pyrda nyngkong ha ka minit ba 10 jong ka jingïalehkai ba la thep da u Dajiedlang Wanshnong da ka jingïarap pashat bol Nikelson Bina. Kadei ruh ka kol kaba nyngkong na bynta au Dajiedlang Wanshong ha kane ka samoi ïalehkai OC Blue SPL.
Watla ka Mawlai ka la ïakhun tyngeh ban thep kol shuh shuh hynrei haduh kaba kut jong ka kylla step ka khlem urlong, bad dei ha ka kylla miet ka la ïoh biang ban thep kol.
U Remark Kharmalki u la ïoh ban thep ïa ka kol kaba ar na bynta ka Mawlai ha ka minit kaba 50 jong ka jingïalehkai da kaba ïoh thep napoh box ha kaba u rangap kol ka Mawkhar u Banshanskhem Kharsyntiew u la pyrshang ban kyrda hynrei ka bol ka la rung beit jlang shapoh kol.
Ka Mawlai ka la ïai bteng ban ïakhun bad shwa ban kut ka jingïalehkai (90+4min) u Banshanskhem Kharmalki u la ïoh ban thep sa ïa ka shi kol kaba la wan lyngba ka jingshut free-kick na u Bina uba la ai sha u Donlad Diengdoh, ha kaba u Donlad u la ïarap ai thep kol na bynta u Banshanskhem bad ka Mawlai SC ka la pynliem syndon da 3-0.
Watla ka Mawlai ka la mih madan khlem u Brolington Warlarpih uba dei u kapten uba la ïoh red card ha ka jingïakhun kaba lah dep, hynrei ka jingïalehkai ha ka bynta ba shadien ka skhem hi triang. Ka Mawkhar ka la mad nam rem kaba phra sien ha kane ka lympung bad don ha ka miej kheiñ poinñ jong ka jingshah pynhiar kyrdan da kaba kamai tang 6 poiñ.
Mynta ka sngi ka jingïalehkai kan long hapdeng ka Rangdajied United FC (18 point) pyrshah ïa ka Malki SC (7 point). Ha ka jingïakhun ba lah dep kitei ki ar tylli ki team ki la ïakhaid da 0-0.
