Ka tnat Shillong Traffice Police (SPT) wat ha i bor barit ka la pyrshang ban weng ïa ka jingdheng kali kaba jur bha hapoh ka nongbah Shillong, hynrei kumba ka paw, ka jingkharoi ki kali ha ka nongbah ka la nang kiew nang kiew katba nang mih ki sngi kat haduh ba ka la pynsuhsat ym tang ïa ka tnat Pulit hynrei wat ïa ki paidbah nongïaid nongieng kiba ïakynduh mawsiang ha ka leit ka wan namar ka surok ka ïaisah hi kumjuh naduh ba la pynkha ïa ka Jylla Meghalaya na ka Assam.
Ka jingpyntreikam jong ka Shillong Traffic Police ïa u “Khnap” (Clamp) kam pynpei skhor ïa ki nongniah kali namarba ki nongniah kali pynieng ïa ka kali wat ha ki jaka ba la thoh “No Parking,’ kaba wanrah pat ïa ka jingsuhsat jong ki nongniah kali kiba bud ïa ki kyndon aiñ ñiah kali bad ïa ki nongïaid nongieng. Ka jingbym biang ki lynti ïaid kjat ka buh jingma haduh katta katta ïa ki nongïaid lynti namar ki don ki khep ha kaba ki paidbah ki hap ban ïa synrud lang bad ki kali.
Ka jingbun shaba palat ki kali khamtam baroh shitaiew mynta ba ki skul bad ki Kolej ki la plie ka la pynsuhsat bha ïa ka tnat Pulit Pynïaid Kali. Ka Sor Shillong ka la nang rit katba ka jingbunbriew ka la nang kiew manla ka sngi.
Ka jinglong amriang jong ki nongniah kali kiba pyrkhat tang ïa ka malade ka pynsyrtok ïa kiba bun. Ka daw kam dei namarba kim tip ïa ki kyndon aiñ niah kali hynrei ka dei tang namar ka jingsngew baheh. Ka tnat Pulit watla ka la pynshitom ïa ki nongpynkheiñ da kaba shaiñ kuna bad da kaba pyndait da u Khnap pynban ki paidbah ki dang ïai leh saitlah ïa ki jingmaham bad jingmana jong ka tnat Pulit.
Ka jingailad ban pynieng ïa ki kali shilynter ka surok ka dei kawei na ki daw bah kaba ju wanrah ïa ka dheng kali namar ki don beit ki riewshimkabu ki ban phrung ban pynieng ïa ki kali wat haba ki la ïohi pylleiñ pylleiñ ba wat jaka pynieng kali ruh kam don shuh. Tangba biang ka malade shimet, kam pher watla kiwei ki suhsat ne ki khñium.
Ha Khyndai Lad ka jingailad ïa ki taksi kamai ban pynieng katba mon ha ka surok Keating Road ban mih sha Khyndai Lad ka dei ka dawbah kaba wanrah ïa ka jingkhapngiah. Ha Motphran, ka jingailad ïa ki Bos Saw ban leh mon bad leh trai kat haduh ban pynlong kum ka Parking Lot hapdeng surok ki dei ki dawbah kaba wanrah ïa ka jingdheng kali kaba jur bha ha ka surok Guwahati-Shillong Road. Ïa kane lah ban sakhi khamtam ha ka por janmiet, ha kaba ki kali Bos Saw ki ïaid kum ki mattah ban thep pyndap da ki nongshong kali khlem pyrwa la ka surok ka don hapdeng ka jingdheng kali. Nalorkata, sa ka jingdon ki nongdie madan ha shilynter jong ka surok ka la pynwit shuh shuh ïa kane ka surok ha ka thaiñ Motphran kaba long ka kad khaii kaba ju thnem bha da ki nongleit nongwan bad ki nongthied nongpet baroh shisngi haduh janmiet.
Ha Laitumkhrah, ka daw kaba wanrah ïa ka jingdheng kali ka dei namar ba ka long ka jaka pdeng jong ka shlem Pule Puthi jong ka sor Shillong bad ka Jylla Meghalaya, ha kaba baroh kiba na Sor bad ki shnong Khapsor ki ïabeh ban phah skul sha ki skul kiba don ha Laitumkhrah. Da ki phew phew hajar tylli ki kali kiba tyllun ha ki surok ka Laitumkhrah ha ka shi sngi nalor kata, sa ki kali kiba wan na ka thaiñ Jowai. Kane ka dei ka daw kaba la idonkam haduh katta katta ba ki bor pynïaid skul ki la dei ban pyrkhat thymmmai ban weng ïa une u sohkyrdot da kaba buh noh da ki School Bos kumba la ai jingmut da ki Rangbah Shnong bad ki Principal jong ki skul ha ka jingïalang kiba la long ha kine ki khyndiat snem.
Lehse dei tang ka lad ban pyntreikam noh da ki School Bus, yn sa lah ban pynduna khyndiat ïa ka jingdheng kali ha ka thaiñ Laitumkhrah. Lehse ka jingpyntreikam One Way ïa ka surok naduh Dhankhethi ter ter sha Laitumkhrah tang ha ka por long skul kumba ju leh ha ki por kiba mynshwa kan kham pynduna ïa ka dheng kali.
Nalorkata, la sngewdei shisha ba ka Sorkar ka la dei ban tei noh da ki Regulated Market ne ki iew dielang ha ki shnong kiba don ha khapsor khnang ban pynduna ïa ka jingwan tur jong ki paidbah na ki jaka khap Sor Shillong khnang ban weng ïa ka jingdheng kali ha Sor. Ynnai ïakren ïa ka jingdheng kali ha Them Iew Mawlong kaba dei ka kad khaii kaba ju thnem da ki paidbah kiba wan na kylleng ki shnong nongkyndong ban wan siew wan tda bad wan donkam manla ka sngi sha Sor Shillong. Ka jingkhapngiah ka dei ka jingailad ïa ki nongdie jingdie harud surok bad ha ki lynti ïaid kjat.
Ka Sorkar Jylla kan hap ban pyrkhat thymmai ban pynïar ïa ka Sor sha ka New Shillong kumba ka la thmu naduh ki snem kiba mynshwa namar katba nang mih ki bnai ka jingbunbriew ha ka sor ka la nang kiew artet namarba ka jingkharoi ki nongshong shnong hapoh ka Sor Shillong ka la kiew haduh katta katta manla u snem.
