Nongstoiñ, Risaw 6: Ka Hill State People Democratic Party Rambrai Jyrngam Constituency ka la nang khlaiñ bad ?oh mynsiem, da ka jingwan pynïasoh jong ki samla ha man la ki shnong khamtam eh ha ki thaiñ Muliang. Nalor ki samla ki rangbah bad ki longkmie ruh ki la sdang ban trei shitom ban leit sha ki shnong ki thaw ban thung ïa ki tnad treikam khlem da ap ïa u kyrtong, na ka bynta ban pynkhlaiñ ïa ka party shuwa ba ka election ban jied ïa ki nongmihkhmat sha ka Ïingdorbar Thawaiñ ka jylla ha u snem ban wan.
Hadien ba kiba bun ki samla ki la wan ban rung kum ki dkhot ba pura ha ka party, la ?oh ban jied ïa ki nongkitkam bad ki dkhot jong ka HSPDP Youth Wing Tynghor Primary unit, ha kaba la pynskhem ruh ïa ki mynta ka sngi ha ka jingïalang kaba la long ha ka shnong Tynghor.
Hashuwa ban pynskhem ïa ki nongkitkam bad ban pdiang burom ïa ki samla kiba la wan na kiwei pat ki party, kum na ka Congress bad kiwei kiwei ban pynïasoh sha ka HSPDP, la pynlong ïa ka jingïalang ba lyngkot ha kaba la pynïaid da u bah Shandabor Shylla ha ryngkat ka jingïadon lang jong u bah K.P.Pangñiang u ba dei u kyrtong u ban ïa aireng ha ka election 2023 na ka Rambrai Jyrngam lem bad kiwei.
Ha ka jingïalang ban pynskhem ïa ki nongkitkam ka Youth Wing Tynghor primay unit, u bah K.P.Pangñiang u la ong ba ka por ka la dei ïa ki samla ba kin mih madan bad rung sha ka jylli saiñ pyrthei, namar ka lawei jong ka ri bad ka jaitbynriew ka shong ha ki samla.
Ha kajuh ka por u la ong ba ka thaiñ Muliang ka dei ka thaiñ kaba dang sahdien, hynrei lada ki samla ki don ka thong ban shakri bad ban kyntiew ïa ka thaiñ, kan ym don jingeh ban wanrah ïa ka jingkylla ha baroh ki liang. U la ong ruh ba ki samla ki donkam ïa ka jingïatylli bad ka jingïatreilang bad ka bynta kaba donkam eh ka long ban long kiba ïaineh bad kiba skhem jingmut, namar stang katto kane por kin sa don shibun ki ban wan khroh ïa ki da ki ktien jali ja um. Kin pynbiej ruh wat da ka tyngka pliah bad lada ki samla kin bakla bad shah pynbiej ha kiba kum kita khlem pep kin sa babe kylla.
La pynskhem ïa ki nongkitkam bad ki dklhot jong ka HSPDP Youth wing Tynghor Primary unit. Ha kajuh ka por la pynskhem lang ruh ïa ki nongkitkam jong ka HSPDP parents body Tynghor primary unit bad pdiang burom ruh ïa kiba la wan ban pynïasoh sha ka party da u bah D.P.Wanñiang President HSPDP Rimuliang zone. Ki nongkitkam jong ka Youth wing ki long President Draincover Marweiñ, Secretary Mektoris Kharbani, Joint Secretary Banshan J.Syiem, Treasurer Rochestar Kharlyngdoh Organiser Pynshaijoel Dkhar bad 15 ngut ki dkhot ka Executive Committee.
