Nang hiar arsut ka jingshakri ka Nonglang PHC, sah umdum ki paidbah

Nongstoiñ, Nohprah 11: Ka Federation of Khasi Jaiñtia & Garo People Rimuliang Circle ha ka sngi balang ka la leit ban ïakynduh ïa u Dr Z.Marak DMCHO, da ka jingsngewkhia halor ki jingeh ba ki padibah ka thaiñ ki mad ha ka jingïadei bad ka koit ka khiah, khamtam ha Nonglang PHC kaba la ju shakri la bun bun phew snem.
Ha ka jingïakynduh na ka liang jong ka seng ka la pynpaw halor ka jingud ki paidbah ka dong ka thaiñ halor ka jingbym don u nongai dawai ne Pharmacist hapoh kane ka Hospital, kaba la long ka jingdkoh ha kiba bun ki liang, khamtam eh ba ka la ktah ïa ka jingshakri ki Doctor hapoh kane ka Hospital. Kumta ka kyntu ban buh noh u Pharmacist ba pura hapoh kane ka jaka sumar.
Na ka liang ka seng ka la ioh jingtip ba kane ka Hospital kam don ïa ka jaka leit bar na ka bynta ki paidbah kiba leit wat jingïarap nangne. Kumba ka long mynta ki jaka leit bar ki don tang na ka bynta ki nongtrei hapoh kane ka Hospital, kumta ki bor ba dei peit ki dei ban buh ruh ïa ki jaka leit bar na ka bynta ki paidbah kiba leit donkam ha kane ka Hospital.
Halor ka jingbym Ambulance, na ka liang ka seng ka la pynsngew ba ka long kaba donkam eh haduh katta katta ban don ha kane ka Hospital, khnang ba kan pynsuk ïa ki paidbah lada ki donkam ban rah noh sha kiwei ki jaka sumar ba kham biang. Kumba ka long mynta ka Ambulance kaba don ha katei ka Hospital kam long shuh ban dang pyndonkam.
Ka seng ka la kyntu ba dei ba kyntiew kyrdan noh ïa ka Nonglang PHC sha ka CHC, namar ka Nonglang PHC ka long kawei na ki PHC ba la ai jingshakri ïa ki paidbah ka dong thaiñ ha kaba ïadei bad ka koit ka khiah bad kaba la don bun bha ki ba ju phah wan sumar ha kane ka jaka sumar.
Hynrei, namar ba ka dang dei tang ka PHC kam pat biang satia ban shakri ha kiba bun ki liang, kumta donkam ban kyntiew kyrdan noh ïa ka Nonglang PHC sha ka CHC, khnang ba ka jingai jingsumar ïa ki paidbah kan kham bit kham biang nadong shadong.
Ha kajuh ka por ka seng ka dawa ban pyntreikam noh ïa ka Langpih Health Sub-Centre, namar ïa ka Langpih Health Sub-Centre la dep ban tei ïa ka Ïing da ka Health Department hapoh Shnong Langpih la kumba katto katne snem. Hynrei haduh mynta kane ka Ïing ka shu long Ïing jah namar ym shym pat la pyntreikam ïa ka.
Kumta khnang ba ka jingai jingsumar ïa ki paidbah ha ka koit ka khiah kan long kaba kham jan, ka seng ka kyrpad ban plie bad pyntreikam noh ïa kane ka Sub-Centre.