Shillong, K Lyngkot 04 : Hadien ka jingresaiñ noh jong u Bah PN Syiem na ka shuki Deputy Chief Executive Member bad u Bah Victor Lyngdoh na ka shuki Executive Member ka tnad Arts and Culture ha Khasi Hills Autonomous District Council (KHADC) mynta pat sa uwei u Executive Member un pynkhreh ban iehnoh ïa ka shuki kaba u bat baroh shi katta.
Une u Executive Member ban sa ieh noh ïa ka shuki u dei u MDC ka Mawlai, Bah Teibor Pathaw hadien ba ki paid Mawlai ha ka janmiet sngi Saitjain ki la pynbor ïa u ba u dei ban ieh noh ïa ka party NPP kaba u don baroh shi katta bad ba un ïakhun noh kum u kyrtong shimet ha kane ka elekshon MDC kaban sa long ha ka 21tarik Rymphang.
Kumta, da kane ka jingkylla ha ka saiñpyrthei khamtam hadien ba u Bah Teibor u la mynjur bad pdiang ïa ka jingkyrpad ki paidbah, un hap ban ieh noh ïa ka shuki Executive Member ba dei peit ïa ka tnad Land bad Building Bylaws bad kumjuh ruh ïa ka jinglong dkhot ha ka party NPP.
Ban shu phai dien, dei ha ka 13tarik u Nohprah, 2024 ba ki lai ngut ki MDC jong ka Congress ba kynthup lang ïa u Bah Ronnie V Lyngdoh MLA/MDC ka Mylliem ryngkat u Bah PN Syiem kumjuh u Bah Victor Ranee ki la weng noh ïa ka jingïatrei lang ha ka Executive Committee ba ïalam da ka NPP halor ka nongrim ba ka don ka jingpynbor na ka liang ki nongïalam ka party.
Katei ka jingweng noh jong ki ïa ka jingïatrei lang kadei ruh khyndiat sngi shwa ka Dorbar Tlang kaba dei ruh ka sien shong Dorbar kaba khatduh jong ka KHADC ha shwa ba kin leit noh sha ka elekshon kaban long ha u Rymphang.
