Shillong, Risaw 24: Namar ka jingjur palat u slap uba la sdang hynnin ka sngi bad bteng mynta ka sngi ruh, u ki bor synshar District ha East Khasi Hills bad Eastern West Khasi Hills, ki la pynbna ba baroh ki skul kin ïoh shuti ha ka 25 tarik mynta u bnai.
Lah ban kdew hangne ba ka India Meteorological Department ka la maham ba kan don ka jinghap slap ha baroh kawei ka jylla ha haduh ka 25 tarik mynta u bnai na ka daw ka jingwan ka ‘erïong Sitrang na Bay of Bengal.
Ha kajuh ka por na ka liang ki bor District jong ka Ribhoi, West Jaiñtia Hills ruh ki la pynbna ban khang skul lashai ka sngi.
Lah ban kdew hangne ba ha kine ki bnai kiba ladep, hadien ka jinjur palat u slap bad ka jingrwa ki ïing ki sem, kaba kum kane kajuh ka jingpynbna khang skul ruh ka la jia, ha kaba ki skul ha baroh ki jaka ba jur u slap ki la khang kumba ar ne lai sngi.
