Nongpoh, Nailur 04: Ka long shisha ka sngi ka sngi kaba sah jingkynmaw na ka bynta ki nongrep ha ka thain Ri Bhoi Sepngi bad khamtam ïa ka Jirang Organic Agro Farmer Producer Company ha kaba kum ka kynhun ki nongrep ba la shalan ïa u Sohñiamtra sha Dubai mynta ka sngi ka la lah ban plie paidbah noh ïa kawei ka Karkhana ba la tip kum ka Meghalaya’s First Aseptic Pulping Unit and Mandarin Sorting, Grading & Waxing Unit, kawei na ka Karkhana ka ban sa pynmih bun jaid ki umsoh na ki jaid soh bapher bapher ba rep ki Nongrep.
Kane ka Karkhna ka Jirang FPC, ka dei kaba don ha ka Shnong Jiramg bad la mang tyngka ha ka jinglut kaba la kot sha ka Rs. 1.50 klur bad mynta ka sngi da ka jingsarong la wan ban plie paidbah da ka Kong Ampareen Lyngdoh, ka myntri ka tnad ka kam rep kum ka kongsan bad la sakhi lang ruh da ka jingdon lang u MLA ka Jirang u Bah Sosthenes Sohtun, u Abhilash Baranwal, Deputy Commissioner Ri Bhoi, ka Kong Ibalahun Thangkhiew, CEO Jirang FPC, ki ophisar na ka Agriculture, Horticulture bad kynthup ruh naduh ki nongïalam Shnong bad ki nongrep ka thaiñ Jirang.
Kum ban pynkynmaw, ïa kane ka Jirang FPC, la seng ha u snem 2017 ha kaba mynta ki kot haduh 434 ngut ki dkhot bad ka long ruh ka jingkyrkhu na ka bynta ki nongrep ba ki nongrep ki lah ban pynpoi jan baroh ki jaid mar rep kum u Sohniamtra, ka Kait, u Sohtrun, u Sying bad kiwei ki mar rep, ba kane ka Karkhana kan shim ha ka dor kaba biang kaba long shisha ka jingkyrkhu ïa ki nongrep.
Ha kawei ka bynta, kane ka Karkhana kaba don ha Jirang ka dei ruh ka Karkhana kaba la don ka jingïatehlok bad ka Lulu Group International, bad kane ka jingïatehlok bad katei ka kynhun ka long ban pynsuk ïa ki mar rep ba la shalan da ka Jirang FPC sha kiwei ki jylla bad wat shabar ri ha ki ri ka pythei.
Haba kren ruh ha kane ka sngi, na ka liang ka Kong Ampareen Lyngdoh, ka la pynpawshisha ïa ka mynsiem jong ka jingkmen ban ïoh ban ïashimbynta ha katei ka sngi lehkmen bad ki nongrep ha ryngkat ka Jirang FPC, ba kane ka sngi ka la long shisha ka sngi kaba jop ban plie paidbah ïa katei ka Karkhana shna umsoh ka ban sa long shisha ka jingkyrkhu ïa ki nongrep bad ki paidbah katei ka thain Ri Bhoi Sepngi.
