Nalor ka pisa, ïoh jinghikai ki nongrep ka them Mylliem ban pynheh ïa ka rep ka riang

Shillong, Jymmang 24 : Baroh ki skim sorkar ne ki kam pynroi ba ju poi sha ki paidbah kim dei ba ki wan hi khlem da don kiba pan lane kiba buddien na ka sorkar, ong u MLA ka Mylliem ba dei ruh u Myntri ka tnad Soil and Water Conservation, Bah Hamlet Dohling ha ka jingïalang ai jingïarap bad ai jinghikai ïa ki nongrep ka thaiñ Mylliem kaba long ha kane ka sngi Ba-ar ha Mylliem.
Haba kren kum u Kongsan ha ka jingïalang kaba la pynlong da ka Public Implementation Committee Umtongsyiem-Umjilieng bad Mylliem RIDF ha Mylliem Madan Iing Syiem, u Bah Hamlet u ong ruh ba hadien ba u leit kylleng ki shnong ban ïathuh shaphang ka skim ba wan na ka Soil bun ki paidbah ki la kyndit namar ki nang tharai ba ka tnad Soil kam don shuh.
Shuh shuh u la ong ruh ba dang nyngkong haba u phah ïa ki ophisar ka Soil ban leit peit kylleng kylleng ban shna ïa ki kynroh, ki check dam, ki jingkieng bad ker ïa ki jaka rep ki nongrep kim ngeit shuh namar ki la nang tharai ba ka tnad ka la ïap.
“Nyngkong bun ki ong ba ki shu wankai hynrei ynda ki la ïohi ïa ka kam ki sa ngeit biang ba kane ka tnad ka dang don bad ka dang ïai bteng ban trei,” u la ong. Nalorkata u ong mar ïa shimti kumnu Myntri jong ka tnad u la buddien ban peit ba ka jingpyntrei ïa ki skim bapher bapher kam dei tang ha Rilum Garo ne Rilum Jaiñtia hynrei kylleng ki bynta jong ka jylla.
“Ki skim jong ka sorkar ki bun bha tangba kim wan hi sha ki shnong ki thaw hynrei donkam ban don u nongleit pan ne u nongpynïoh. Wat ong ba kane ka skim RIDF ka wan hi hynrei ka la don naduh mynshwa,” u la bynrap shuh shuh.
U Bah Hamlet u la ïathuh ruh ba kum u MLA ka thaiñ tang haduh mynta u la lah ban wanrah haduh 6 klur tyngka ka skim jong ka Soil & Water Conservation ha kaba ki nongshong shnong ki la ïoh ïa ki jingkieng, ki jingker, ka jingpynbha ïa ki lyngkha rep kumjuh ruh ïa ki jaka pynlang um ne ki check dam bda ruh wat ban pynieng ïa ki kynroh ban ïada na ka jingtwa ka khyndew ne ki jaka rep.
Kum u Myntri u la ïaroh ruh ïa ka jingdon jong ka tnad ïa ki nongtrei kiba tbit namar ym pat don kawei ruh ka jingtrei la ka long ki jingkieng, ki jingker ne ki kynroh kiban khyllem ne twa ha ka jingther jong u lapbah dang shen.
Ha kane ka sngi, u Myntri u la sam ruh ïa ka song pisa kaba mar 4000 tyngka sha ki 464 ngut ki nongrep na ki 15 tylli ki shnong ba hap ha ka Myliem Them ba kin pynbha ïa ki lyngkha rep jong ki, nangta ruh u la sam sa 250 tylli ki kor synreit dawai ba kin lah ban pyndonkam lang ha ki shnong ki thaw jong ki.
U la ong ruh ba katei ka sienjam ban ïarap ïa ki nongrep kan nang ïai bteng na ka bynta kito ki shnong bad ki nongrep ki bym pat ïoh. Ha kajuh ka por u ïaroh ruh ïa ka PIC namar ka jingtrei borbah jong ki ban kyntiew bad ïarap ïa ki nongrep ba kin lah ban pynheh bad pynïar shuh shuh ïa ka rep ak riang ha ka thaiñ.
Ha kane ka sngi, ki nongrep ki la ïoh ruh ïa ka jinghikai na ki ophisar ba kynthup ïa u Bah Harvester Dohling, Assistant Director ka tnad Agriculture bad ruh na u Bah Wanshan Kharkongor, Divisional Officer jong ka tnad Soil and Water Conservation.