Nongpoh, Jylliew 28 : Nalor ka kam shakri Blei ba ki khun samla ku ju pynlut por ban ïaroh ïa u trai, ka kynhun jong ka Nongpoh Senior CE Society jong ka Balang Presbyterian Nongpoh mynta ka sngi kila long ka nuksa ban mih sha surok bah haki bynta jong ka shnong Pahamlapong-Pahamsohthri bad Mawdiangum ban pynkhuid ïaki jaboh jabaiñ, ki plastic bala bret pathar da ki paidbah ki bym don ka jingburom ïaka mei mariang.
Ha katei ka jingpynkhuid, la snohkti lang ruh da ki seng samla jong ka shnong Pahamlapong-Pahamsohthri, Mawdiangum lem bad ki samla pule NSS jong ka Ri Bhoi College.
La sakhi ruh ha katei ka sngi da ka jingwan shim bynta u Bah Mathew Makdoh Nominated MDC kum u kongsan haka jingdonlang ki Rangbah Shnong jong kitei ki 2 tylli ki shnong, Bah R. Nongtri, President Nongpoh SCES, Bah J. Mawlong, Chairman Social and Recreation Committee, Tbn. D. Ranee lem bad ki khun samla ka Balang bad kitei ki 2 tylli ki shnong.
U Bah Mathew K Makdoh haba kren ha kane ka sngi kum u kongsan u la ong ba ka khuid ka suba ka dei kaba kongsan haka jingim jong u briew, bad kane ka jingmih ki samla ban pynkhuid ïaka shnong ka thaw ka long kum ka khubor bad ka nuksa ba bha sha kiwei pat ki shnong bad ki para samla ba kin bud naka bynta ka khuid ka suba jong ka shnong ka thaw bad kumjuh ka mariang kaba koit ba khiah.
