Shillong, Ïaiong 10 : U bah John Khongjee, u kpa jong u samla Welkin Stone Shadap, uba la ïoh khur ïa ka khusnam Asia Book of Records u la pynpaw ba u khun jong u mynta u don ïa ka jingangnud ban pynkheiñ sa ïa ka World Record kaba u donkam ban ïaid 235 kilomitar hapoh ka 24 kynta na ka bynta ban ïoh ïa kane ka rekod kaba heh ha ka pyrthei.
U bah John u la pynpaw ïa kane ha ka sngi ba ka United Democratic Party (UDP) Mawlai Circle ka la pynkup burom ïa u samla Welkin uba la wanrah nam bad burom ïa ka Mawlai bad kumjuh ïa ka ri bad jaitbynriew ha ka jingïalang kaba la pynlong ha ophis treikam jong u bah PT Sawkmie, MLA barim ha Mawlai Nongpdeng mynha ka sngi Saitjain.
Ha kane ka sngi pynkup burom nalor u Bah PT Sawkmie, la don lang ki heh UDP Mawlai Circle, kum u bah Homer Kharkongor, President, bah Wanseng Jyrwa, Working President, ki dkhot ka UDP Mawlai bad kiwei kiwei.
Ha kane ka jingïalang la ïoh ruh ïa ka jingkren na u bah PT Sawkmie bad na bah Wanseng Jyrwa, kiba la ai mynsiem ïa u samla Welkin ba un nangtrei shitom, khnang ba un lah ban pynurlong sa ïa ka thong ban pynkhein ïa ka World Record, kumba u la angnud.
Kumba shu kdew u samla Welkin u dei u khun jong u bah John Khongjee bad u la lah ban thaw ïa kane ka rekod mynha ka 26 tarik u Kyllalyngkot ha kaba u la ïaid kjat na Mawiong Rim shaduh Sohryngkham bad wanphai biang sha Mawiongrim bad ban hiar pat sa sha Saiden, Nongpoh ban pyndep ïa ka jingïaid kjat ba 100 kilomitar hapoh 24 kynta.
Une u samla u la mih na la iing ha ka por 3 baje la lah san minit mynstep bad u la pynkut ha ka por 10.38 minit mynmiet. U la lah ban ïaid 101.54 kilomitar bad ka la shim por ïa u haduh 19 kynta bad 33 minit ba un pyndep.
Ka Asia Book of Record ka la pynthikna ïa ka jingjop jong u ha ka 14 tarik u Rymphang, 2023 bad ka la pynpoi ruh sha iing jong u ïa ka khusnam kaba u dei ban ïoh.
Ka Asia Book of Record ka la ibit ïa une u samla ban ïoh ïa kane ka khusnam dei lyngba ka jingmynjur lang ka India Book of Record, ka Vietnam Book of Record bad ka Nepal Book of Record.Kumba shu pynkynmaw ka Asia Book of Records ka ïasnohkti lang bad ka World Record University bad kumjuh ruh bad ka International Protocol of Records.
Une u samla mynta u dang pule ïa ka BSC ha Synod College bad u don ia ka jingsngewtynnat ban iaid kjat naduh ba u dang rit bad u ju don ïa ka jingthrang ban ïoh ïa ka rekod kum u nongïaid kjat ba sted tam ha ka pyrthei bad mynta u la ïoh ïa ka Asia Book of Records.
