Shillong, Naiwieng 22 : U Myntri Rangbah ka Jylla Conrad K Sangma ha ka sngi Saitjain u la pynbna ba ka phlim ba nyngkong hapoh ka Meghalaya Film Policy ka la dep ban ban ring lut, ha kaba ïa ka phlim Telugu “Baa Baa Black Sheep” la ring baroh kawei naduh ba sdang haduh ba kut ha kane ka jylla Meghalaya.
“Hapoh ka Meghalaya Film Policy, la pyndep ïa ka phlim kaba nyngkong. Kane ka dei ka phlim Telugu kaba kyrteng ka ‘Baa Baa Black Sheep’ kaba la ring hapoh 25 sngi bad shispah na ka shispah ka jingringdur ka la long hi hangne ha Meghalaya, kaba kham bun ka dei ha ki thain Sohra,” la ong u Myntri Rangbah.
Shuh shuh u la ïathuh ruh ba kane ka phlim ka la ai kam haduh 2,000 ngut ki khynnah shynrang bad kynthei na ka thain, kaba la ai jingkyrshan ïa ka ïoh ka kot jong ka thain.
U Myntri Rangbah u la pynpaw ïa ka jingkmen, da kaba ong, “Nga sngewkmen shibun bad nga kyrmen ba kin sa wan shuh shuh ki phlim kiba kum kine bad ka Meghalaya kan sa long ka jaka kaba pawnam bha na ka bynta kane.”
U nongpynmih ïa ka phlim u la ïaroh ïa ki nongïalam bad ki paidbah ka Meghalaya, da kaba ong, “Ka la long ka jingshem kaba khraw hapoh ka jingïalam jong phi bad ki paidbah ba itynnad jong ka Meghalaya, ngi lah ban pyndep ïa ka phlim kaba heh haduh katne hapoh 30 sngi, kaba long kumba 25 sngi, kaba long ka rekod hi.”
Ïa kane ka phlim yn pyllait paidbah ha ka ktien Khasi, bad u nongpynmih phlim u la khot ïa u Myntri Rangbah ka jylla sha ka jingpyllait paidbah ha Hyderabad ha kaba u Myntri Rangbah ruh u la kular ba un sa poi.
