Katba nangïaid ki por ki sngi bad ki snem ka jinglong jingman jong ki briew ruh ka la nang kylla. Watla kane ka jingkylla ka la wanrah shibun ki jingroi jingpar bad jingbha ha ka liang ka imlang sahlang. Ha kine ki por ba mynta ngi ïohi harum haneng ba ka jingïaburom briew ka la jan duh noh bad wat ka mynsiem jingïatip lem para briew ruh i kumba ka la ïap.
Ki ‘tien sneng bad jingkren khlem akor ha ki lynti syngkien ki la jyllei haduh katta katta, la ha kiba la san la rangbah, ki samla wat haduh ki khynnah rit ruh. Teng teng i kumba baroh baroh ngi la ïa mlien bad sngewtynnad ban sngap ne ngi la set kyllut noh ïa la ki jong ki shkor.
Haba ïaid sharum shaneng ngi ïohi ba ki kynroh ha ki surok, ki jaka shong ne seat kali, ki counter ha ki bank bad ki jaka leit shabar ki dap da ki jingpruid dak da ki dak bad dur khlem akor.
Ym lah shuh ban mutdur ba kito kiba mlien ban leh ïa kitei ki jait kam ki don ne em ka jingïatip lem ne kata ka bor sngewthuh briew ka ban pynpyrkhat ïa la ka jingleh ka pynsngewtynnad mo ïa kiwei pat kiba ïohi bad pule haba kum kitei ki jait jingthoh bad jingdro ki pashat ne phalang ha ki khmat jong ki briew ne wat ha ki khmat jong kiba ha ïing hasem ne ki kmie ki kpa jong ki hi ruh.
Lada ka jingïatip lem bad jingsngewthuh briew ka dang don hapdeng jong ki briew nga tharai ba kum kitei ki jait ktien jaboh kin nym ïoh jaka hangno hangno ruh. Kane ka pyni shai ba ym don shuh ka sneng ka kraw na ki ïing ki sem. Ki kmie ki kpa ki ba la san la rangbah kim ïa don por shuh ban ïa phylliew jingmut ha ïing ha sem, halor kaba sniew bad kaba bha khnang ba kiba dang khie dang san kin sngewthuh bad bud ïa kaba bha.
Ka dei ka kamram ba tynrai jong ki kmie ki kpa ki kñi kiba la san la rangbah ban hikai ïa ki khun ki kti ki pyrsa ki para kumno ban ri ïa ka akor bad burom la ha ïing ha sem ne shabar naduh ba ki dang rit. Ki nonghikai skul pat ki don ka bynta kaba kyrpang ban ai ha ki khynnah ïa ki jinghikai shaphang ka akor nalor ka pule ka puthi bad ka jingnang jingstad.
Ha ki por barim, mynba dang ïeng rasong ka akor briew bad ruh ka jingïatiplem jong ki briew ka dang im. Ka jingïaburom para briew ruh ka dang don, ym ju kham lap ne shem ba u khynnah un shlan ban kren ki ktien khlem akor hajan jong ki rangbah briew bad ki riewtymmen. Ynnai ïakren shaphang u duma ne sikret ha kito ki por ki khynnah rit kim ju nud ban dih duma ne sikret ha khmat kiba san la rangbah la ki long kiba ithuh ithaw ne khlem ithuh ithaw.
Hynrei ha kine ki por ba mynta ym don shuh uba salia ban leh ïa kitei ki kam wat hakhmat kiba ha ïing ha sem ne wat ha khmat ki kmie ki kpa la jong hi ruh. Haba ïakren ïa kaba shabar ne la ka ïing ka sem lei lei te ki khynnah ki nud wat ban shong dih kyiad, kynja bad ruh kiwei kiwei pat ki jingdih buaid ha ki surok ki lynti syngkien khlem da salia ïa ki nongïaid nongïeng kiba la san la rangbah ruh.
Kumba la kdew haneng ki jinghiar dor ka akor briew khamtam ha ka ktien ka thylliej khamtam eh hapdeng ka jaidbynriew jong ngi, ym tang ba ka pynsarong ne pynsngewsih ïa uba bun balang hynrei ka long pynban ka kabu ïa kiwei pat ki jaidbynriew ban pyndonkam ïa ki ktien jaboh haba ïaid ki kynthei, ki longkmie, kumba ju ïoh sngew ha ki lynti ki syngkien bad ki ïew ki hat.
Da shisha ki Dorbar shnong ha ki shnong bapher bapher jong ka ri Khasi ki ju buh ki adong la ha ki nongshong shnong ne nongïaid lynti ba kim bit ban pyndonkam ne kren ïa ki ktien jaboh hapoh shnong poh thaw, hynrei kam long kaba suk ïa ki nongpynïaid shnong ban ap ha baroh ki jaka ban kem ïa kito kiba pynkheiñ ïa ki adong.Ha ka jingshisha ki dorbar shnong ki long ki bor ba ha khlieh ha ki kam synshar shnong, kine ki dorbar ki kynthup ïa baroh ki nongshong shnong Khasi.
Kaba phylla bad pynlyngngoh ïa bun ki briew khamtam ki khyllah jaid ne bar jylla ka long ba kumno ki trai jylla hangne kim ju bud ne burom ïa kaei ba ki nongpynïaid shnong ki buh bad adong.Lada kin jyn da burom bad kohnguh ïa ki adong shnong tharai ki tien khlem akor ha kiba bun ki shnong ki thaw kin nym jyllei katne katne.
Watla ka akor briew ka la hiar dor ha bun ki liang ha ka imlang sahlang kam dei ban wanrah ïa ka jingsngewdiaw ban duh jingkyrmen, hynrei dei ban wad ïa ki lad ki lynti kumno ban pynbha bad pynrung biang ha ki briew ïa ka mynsiem ïatiplem khnang ba kin phai biang sha ki sngi mynba ka akor ba bha hapdeng ka jaidbynriew ba dang ïeng rasong.
Ka la dei ruh ka por ba ki kmie ki kpa kiba la heh la san kin kyndit bynriew kumno ban hikai ïa la ki khun ba kin nym pyndonkam ïa ki ktien jaboh ha ïing hasem, ha lynti syngkien bad shabar. Donkam ruh ïalade ban kiar na kaba pyndonkam ïa ki ktien jaboh ha khmat kiba dang khie dangsan.
Ha kaba ïadei pat bad ki nonghikai skul ruh la sngewdonkam ba kin nangkham shim khia ha kaba kumno yn ai ka jinghikai ïa ki khynnah khnang ba kin nang ban burom ïa kiba la san la rangbah bad khamtam eh ha ka ban kiar na ki bad ki nongtrei balang jong ki jait niam bad balang bapher bapher kiba don ka bynta kaba kyrpang bad ba kongsan ha ka ban tei ïa ka jingim briew ha ki kam mynsiem, kin kynmaw ba ryngkat ka jingïalap niam donkam ban kyntiew ïa ki briew ha ka liang ka akor khnang ban bha ka imlang sahlang.
