Naduh dang step phyrngap mih ryntih ki nongthep vote ha Mawkyrwat bad Ranikor

Mawkyrwat, Rymphang 27: Ki paidbah nongshong shnong kiba dei ki nongthep vote ha ki ar tylli ki konstitwensi Mawkyrwat bad Ranikor, mynta ka sngi ki la mih paidbah naduh dang step phyrngap ban leit thep ïa ki vote ba jied ïa ki nongmihkhmat sha ka Ïing Dorbar Thawaiñ 2023 jong ka Jylla Meghalaya.
Lah ban kdew ba hapoh 36 – Mawkyrwat Constituency kaba don 65 tylli ki Polling Station ka jingwan jong ki nongthep vote na ka bynta ki phra (7) ngut ki kyrtong ka long 87.88%.
Katba ha 35 – Ranikor Constituency kaba don 77 tylli ki Polling Station pat ki nongthep vote ki poi 89.12% na ka bynta ki hynñiew (9) ngut ki kyrtong.
Kane ka jingkheiñ ïa ka jingwan poi jong ki nongthep vote ka dei tat haduh ka 7 baje janmiet katkum ka jingïoh lum jingtip.
Ha kane ka sngi la ïoh ruh ban ïa kren bad ki katto katne ngut ki kyrtong kiba la mihkhmat ban ïa khun ha kane ka MLA Election 2023 ha kaba ki la kyntu ïa ki paidbah ba kin ïa mih ryntih ban wan thep ïa ki vote jong ki khlem da pynleh noh ei namar ka dei ka hok jong ki ban leh ïa kata ka bynta ban jied ïa u nongmihkhmat ba ki ki mon.