Naduh ba wan u Narendra Modi ha Shillong, nga la angnud dikdik ban rung BJP: Dios

Nongstoiñ, K’lyngkot, 18: Katto katne bnai mynshwa u la kren sha ki lad pathai khubor ba un ym ïaknieh tiket shuh lane ïaleh elekshon, hynrei ka kam ba dei ba un leh ka long ban pynkhlaiñ ïa ka party HSPDP kaba long ruh ka party ba la seng nongrim da u (L) Maieit Hoping Stone Lyngdoh, ka party kaba pynjop ruh ïa u ha u snem 2016 ha ka bye elekshon. Hynrei, mynta ka sngi 18 tarik u Kyllalyngkot 2023 la pyntikna pat ba u la ong u dkhot ba pura jong ka party BJP.
Une u rangbah u dei u Bahduh Diostarness Jyndiang ex MLA jong ka Nongstoiñ Constituency bad ki khubor ki ong ruh ba u da thrang hir hir ka dohnud ban ïoh ban ïakhun syndon na kane ka party sha ka general election MLA 2023.
Ïa u Bahduh Dios la da wan hiar kyrpang syndon da ki heh ki haiñ ka party BJP ha ka Jylla, ba kynthup naduh u Bah A.L Hek MLA Pynthorumkhrah, Bah Sanbor Shullai MLA ka Laban, H.M Shangpliang MLA Mawsynram, Bah David Kharsati, nangta u Bah W.R Marbaniang President BJP West Khasi Hills bad kiwei de.
Ha ka jingïalang kaba la long ha Bishop Hall Nongstoiñ, shuwa ba u bah A.L Hek un pdiang burom bad pyndeng ïa ka muffler jong ka party sha u Bah Dios, la ïoh ïa ka jingpynshai lyngkot na u bah David Kharsati ha kaba ïadei bad ki mat treikam jong ka party. Nangta la kren pdiang sngewbha ïa u bah Dios Jyndiang lem bad ki ar ngut kiwei pat ki rangbah, kata u Dr Kharbani bad u bah Fulling Wanniang u ba long ruh uwei na ki nongkitkam barim jong ka NPP.
Haba ai jingkren na ka liang u bah Hek, u la ong ba ka jylla ka la kynjoh sanphew snem naduh ba la ïoh ïa ka jylla hynrei ka roi ka par ka dang sah hajuh. U la ong ba dei tad hadien ba u Narendra Modi u la shah jied kum u Myntri Rangbah duh ka ri, ba ka jylla ka la sdang ban kiew ha baroh ki liang.
U bah Himalaya Shangpliang MLA ka Mawsynram, u la ong ba kane ka sorkar ba la ïalam da u Conrad Kongal Sangma, ka dei ka sorkar kaba bam duh ïa ka ïoh ka kot jong ki paitbah bad kam don jingpyrkhat satia na ka bynta u duk u rangli tang ban rben ka pla la jong lem bad ki nongbud jong ka.
U la pynkynmaw ruh ba ha ki ar snem ba la leit ha ka por ba ka khlam Covid 19 ka la lynshop, ka sorkar India lyngba u Narendra Modi Myntri Rangbah duh ka ri ka la trei borbah ban pynïoh khaw ha man la ki thliew ïing, ban ai tika ei khlem siew dor sha baroh ki paitbah, na ka bynta ban ïada na ka jingpang covid bad bun kiwei kiwei ki jingïarap kiba ka sorkar BJP ka la leh na ka bynta ki paitbah.
Nalorkata, u la pynshai ruh ba ka ka jingkynnoh ba ka BJP ka dei ka party kaba thombor ïa ki khristan, ka dei tang ka jingpyntieng koh tympan. Hynrei haduh mynta ym pat lap satia ba ka BJP ka hukum ban khang khyrdep ïa ki ïing mane.
U bah Sanbor Shullai MLA ka Laban u la ong ba um shym la poi pyrkhat ba ki paitbah Nongstoiñ ki la sngewthuh bad pdiang ïa ka BJP da kaba ki la wan ban pynïasoh ha kane ka sngi. Kane u ong ka dei ka dak ba ka party ka la nang kiew shakhmat katba dang ïaid ka por.
U la ong ruh ba u la shah jied kum u MDC la lai sien bad kum u MLA ar sien na Laban. Hynrei ha ka jingshah jied MLA ha ka sien ba nyngkong namar ba u don ha ka party NCP, um shym la lah ban ai ïa ki jingïarap kiba biang sha ki paitbah. Hynrei ha kane ka kynti namar ba u la jop na ka BJP haduh 188 klur tyngka tam u la ïoh ban ai jingïarap sha ki paitbah.
U la ong ruh ba ki don shibun kiba kynthoh ba ka BJP ka dei ka party khang bam doh masi, hynrei ma u kum u MLA ka BJP, u la dep pynïoh jingïarap haduh sanphew ngut ki samla kiba ot doh masi hapoh ka Constituency jong u.
U la kyntu ruh sha baroh ki paidbah ka Nongstoiñ ba ki dei ban sngewthuh ba kim dei ban jied shuh ïa ki seng kiba dang hap ap khrong na ka BJP, hynrei da ai jingkyrshan pura syndon ïa kane ka party ban ïoh mad ïa ki jingkylla ba shisha.
Katba na ka liang u Bah Dios pat u la kam ba naduh u 2018, ki nongïalam ka BJP ki la wan khot ïa u. Hynrei, u la ïai ap ïai shah tad haduh mynta ka kynti ba um lah shah shuh, hynrei ban rung noh syndon sha kane ka party, namar u ïohi ïa ka jingtreikam jong ka BJP hapoh ka jingïalang jong u Narendra Modi. Ka jingwan iuhkjat u Modi ha Shillong ka dei kaba la ktah eh ïa ka mynsiem jong u ban ieit BJP, u la ong.
Nalor nangta, u la ong ruh ba ki nongkyrshan jong u, kim kwah ba un sangeh noh ban ïakhun elekshon hynrei ki angnud eh ba un ïakhun beit ïa ka elekshon. Lada ïoh ban ïakhun na ka BJP lei lei u kmen eh, namar dei tang ka BJP kaba lah ban pynkylla dur ïa ka roi ka par bad ka ïoh ka kot.