Naduh 12 tarik Nailar yn sdang ka SSA ïa ka jingïakhun Quarter final jong ka Third Division 2025
Shillong, Nailar 09: Hadien ba la kut baroh ki jingïalehkai League stage jong ka SRGT Third Division Football League 2025 ka Shillong Sports Association ka la pynbna ba kan ïoh ban sdang noh ïa ka wat ïakhun quarterfinal ha ka 12 tarik Nailar ha kaba ka Sanmer kan aireng pyrshah ïa ka Umlyngka, bad ka jingïalehkai kan sdang ha ka por 1:45 baje mynsngi.
Ka jingïakhun quarterfinal kan long ha ka sngi ba bud (13 tarik Nailar) hapdeng ka Umrynjah bad ka Nongumlong, ha ka por 1:45 baje mynsngi.
Nangta ka Quarter final kaba lai kan long ha ka 18 tarik Nailar hapdeng ka Madan SCC bad ka Umiew Maw U Sam, ha ka por 2:45 baje nohphai sngi. Ha ka sngi ba bud (19 tarik Nailar) kan long ka jingïalehkai quarter final kaba saw bad kaba khatduh hapdeng ka Mawkriah West bad ka Iatyllilang ha ka por 2:45 baje nohphai sngi.
La buh ruh ban pynlong ïa ki jingïakhun semifinal ha ka 25 bad 26 tarik Nailar, katba ka final ha ka 30 tarik Nailar. Baroh kine ki jingïalehkai la buh ban sdang ha ka por 2:45 baje nohphai sngi. Ka jaka na ka bynta baroh ki jingïalehkai knockout yn pynlong ha madan First Ground-SSA Stadium, Polo. Ka SSA ka lah ruh ban pynkylla ne pynkynriah ïa ka sngi ïakhun lada jia ba donkam.
Ki ar tylli ki kynhun kiba poi sha ka phainal kin ïoh ban kiew kyrdan sha ka Second Division jong ka samoi ban wan.