Naba ïa kynduh jingeh ki paidbah ha ka ktien ka thylliej bad ki nongtrei Bank, leit ai jingthoh ka KSU

0

Mawkyrwat, Risaw, 05: Ka Khasi Students’ Union (KSU) jong ka Mawkyrwat Circle bad Mawkyllut Unit ki la leit ban ïa kynduh ïa ki nongtrei jong ki jaka pynlang pisa ne ki Bank kiba hapoh ka Mawkyrwat Area ryngkat ki jingthoh ban pynsngew ha ki ïa ki jingeh ba ki paidbah ki ïa kynduh jingeh ha kaba ïa dei bad ka ktien ka thylliej ne bad ki rukom treikam jong ki nongtrei ha ki jaka pynlang pisa ne ki bank.
U Shining Lyngdoh, Chairman ka Development & Employment Cells jong ka KSU Mawkyrwat Circle haba kren ha ki lad pathai khubor u la ong ba ki don ruh katto katne ki nongtrei kiba kham khor ha ka ktien ka thylliej haba ki kren ïa ki nongwan donkam bad da ka jingkren tohmet jong ki ka pynlong ïa kiba wan donkam ba kin rit mynsiem noh. Namarkata, ka u la dawa na baroh ki shnad treikam jong ki bank hapoh jong ka South West Khasi Hills District ba kin long kita kiba sbun bad ba sngewthuh ïa ki jingeh jong ki paidbah da kaba kin pynïadei ruh ha ka ktien ka thylliej.
“Ngi la dawa ruh ba ïa baroh bank ba dei ban wanrah noh da ki nongtrei khasi khnang ba kan nym don kano kano ka jingbym ïa sngewthuh ha ka ktien ka thylliej”, ong u Amos Kharjahrin Public Secretary ka KSU Mawkyrwat Circle. Ha ka juh ka por u la kyntu ruh na ka bynta ki khun samla jong ka distrik, ka jylla baroh kawei na kin long kiba mih shakhmat ban ïa khun na ka bynta ki competitive exam ha ki bynta bapher bapher khamtam eh ban long ki nongtrei ha ki bank khnang ba kan long ka jingïarap na ka bynta ki paidbah nongshong shnong khamtam eh ha ki jaka nongkyndong.
Ha kane ka jingleit ban ïa kynduh jong ka seng ïa ki nongtrei hapoh ki jaka pynlang pisa ki long ïa ki Branch Manager jong ki bank, kaba kynthup ïa ka HDFC Bank, ka ICICI bad ka SBI jong ka Mawkyrwat Branch, ban pynsngew ha ki ïa ki jingeh ba ki paidbah ki mad ki ïa shem haba ki leit donkam bad hadien ka jingïatai bad ïa kren sngewthuh bad ki Manager, ma ki ki la kular ban pynbeit kloi ïa kine ki jingeh katba lah.
Ïa ka kynhun ban leit ïa kynduh la lamkhmat da u Shining Lyngdoh, Chairman ka Development & Employment Cells jong ka KSU Mawkyrwat Circle ha ryngkat ka jingïasynlang da ki para dkhot jong ka seng.

Leave A Reply

Your email address will not be published.