Khliehriat Lber 20: Ka Jaiñtia National Council Khliehriat Circle hapoh ka jingïalam u President jong ka circle, u bah Shanborlang Bamon, hynnin ka sngi ka la leit ban iakynduh mar khmat ïa u Sub-Divisional Officer jong ka tnat PHE Electrical, Khliehriat Division, u bah R. Nongtdu na ka bynta ban wad jingtip ba kham bniah na ka tnat halor ka jingpyn poi ïa ka um kor sha ki shnong bapher bapher kiba don hapoh ka thaiñ Khliehriat.
Ha katei ka jingleit kynduh ka seng JNC Khliehriat Circle ïa u heh ka tnat P.H.E ha Khliehriat, la synran lang ruh u General Secretary ka Circle, u bah Symboh Sumer, u General Secretary ka JNC Central Executive Committee, u bah Wanshwa Suting.
La ong ba ha kane ka jingiakynduh, utei u SDO ka PHE, Electrical Khliehriat Division u la iathuh ba kane ka jingpynpoi um sha ki shnong kiba don hapoh ka thaiñ khliehriat kiba kynthup haduh khatar tylli ki shnong kim shym la hap hapoh ka skim Jal Jeevan Mission Scheme hynrei ki hap hapoh ka State Plan Scheme “U la iathuh ruh ïa kane ka project sam um ka State Planning Scheme ha ka jingshisha la sdang naduh u snem 2007 hynrei namar ba ka la sahteng ym lah shuh ban pyndep ïa kane ka project ban pynpoi um sha ki 12 tylli ki shnong kum ba la mang kat kum ka por ba la buh bad la hap pat ban pynthymmai ne revise biang ïa kane ka project bad la buh ïa ka mang tyngka ne ka sanction pat na ka bynta kane ka project ha u snem 2019-2020, bad ïa kane ka project la ioh ban sdang mynta bad ruh la lah ban pynpoi ïa ki pipe um sha baroh ki 12 tylli ki shnong ki ba kynthup naduh ka Deiñsatlang, Umsatai, Rymbai, Diengshynrum, baroh ka Ladrymbai, Khliehriat East, Khliehriat West, Dkhiah East bad Dkhiah West bad ïa ki top ne ki jaka pynlang um ruh la dep ban shna bad kaba dang sah mynta dei sa tang ban test ïa ki pipe um ban pyntikna ba kim nym bthei haba pyndon kam ïa ki ha ka por ba pynpoi ïa ka um sha kitei ki 12 tylli ki shnong. U la ong shuh shuh ba ïa ka tyllong um ruh la dep ban test da ka tnat Pollution Board bad da ka office P.H.E ruh kat kum ka jingbthah jong ka NGT bad la lap ba kane ka tyllong um ka long ka ba bha bad ka long ka um kaba long ban dih” ong u kyrwoh na ka JNC-KC.
“Na ka liang jong ka JNC-KC ngi la kyntu jur ïa ka ophis P.H.E lyngba u SDO ban kham pynkloi ïa kane ka kam katba lah ban ban pyn poi noh ïa ka um sha kine ki 12 tylli ki shnong khamtam sha ka shnong Khliehriat kaba dei ruh ka Headquarter jong ka District kaba don shibun ki briew kiba wan na kylleng ki shnong kiba don hapoh ka District, naduh kiba wan pule, kiba wan trei ïa ki kam sorkar, ki kam bylla bapher bapher, kiba shong wai, kiba wan die dukan kiba na kylleng ki shnong” ong u bah Shanbor Bamon ha u kyrwoh.
La ong shuh shuh ba na ka liang u SDO, u bah R.Nongtdu ruh u la kular ban pynkloi katba lah ban pynpoi um hapoh ka shnong Khliehriat na ka bynta ban myntoi ki ba bun ba lang kiba dei ruh ki briew jong ka District bad u la ong ruh ba ka ophis kan trei kloi katba lah ban pynpoi um ruh sha kine ki 12 tylli ki shnong hapoh jong une hi u snem 2025, pynkut u kyrwoh.
