Shillong, Nohprah, 05: U Myntri Rangbah ka Jylla u Conrad K. Sangma un sa leit ban ïakynduh ha New Delhi ïa u Myntri ka Sorkar Pdeng uba khmih ïa ka tnat Ïada Ri u Rajnath Singh ban kyrpad ïa u ban khmih bniah ïa ka jingtyrwa jong ka Sorkar Jylla ban ai jaka na ka jaka jong ki shipai na ka bynta ka jingpynkynriah ïa ki 342 tylli ki longing na Them Iew Mawlong.
Ïa kane la pyntip da u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar ha ka jingïakren bad ki lad pathai khubor ha ka sngi Palei ha kaba u la ïathuh ba u Myntri Rangbah u lah ban leit sha Delhi lashai ne la shi sngi ban ïakynduh ïa u Rajnath Singh.
U la ong ba ka Sorkar haduh mynta kam pat ïoh satia ïa ka jaka na ka bynta ban pynkynriah ïa ki briew kiba sah ha Them Iewmawlong.
“Ki (tnat Ïada Ri) kwah ban ïakynduh ïa ngi. Dei na kata ka daw u Myntri Rangbah u la buh sngi ban leit ïakynduh ïa u Myntri ka tnat Ïada ri. Ngin sa peit kaei kaba mih na ka jingïakynduh jong ki,” la bynrap u Bah Dhar.
Dang shen, ki nongmihkhmat jong ka Harijan Panchayat Committee (HPC) ka la kyrpad ban pynïoh jaka sah ha ka jaka jong ka tnat Ïada Ri ha ka jingïalang ba la khot dang shen da ka Sorkar Jylla.
Haba kylli halor ka Blue Print jong ka Sorkar, kaba la tyrwa ban pynkynriah ïa ki briew na Them Iewmawlong sha ka jaka jong ka Shillong Municipal Board (SMB), u Symbud Myntri Rangbah u la ong, “ka Blueprint ka la don lypa. Hynrei lada dang don da ka lad kaba kham bha, ngi lah ban shim ïa kaba bha tam. Lada ka tnat Ïada Ri ka ai jaka ïa ngi, ngin ïohei khlem jingsiew. Lada ki ai, kan bha shaba palat bad lada kim ai, ngin hap ban leh katkum ka Blueprint ba ngi la pynkhreh.”
Shuh shuh, u Bah Dhar u la pyntip ba ka Sorkar ka la buh thong ban pyndep noh kham kloi ïa kane ka kam ba la sahteng
“Ïa mynta, ngi la pyrshang ban pynkut ïa kane ka jingeh. Hynrei, ki dang don hi ki jingïakren, ngin ïai ap shipor bad ngin sa shim ïa ka rai kaba khatduh,” u la kular.
