Na u Gadkari dawa ki MP ka NE ban maramot ïa ka surok bah NH-6 ai jingmut ban shna surok 6 lane

Shillong Nailur 23: Ki 4 ngut ki MP ki jylla ka thaiñ Shatei Lam Mihngi, kila phah da ka jingthoh sha u Myntri ka Sorkar Pdeng uba khmih ïa ka Ministry of Road & Transport u Nitin Gadkari, ban maramot bad ban shna pynheh noh ïa ka surok bah National Highway-6 kaba pynïasoh ïa ka Meghalaya, Assam, Mizoram bad Tripura.
Kine ki MP ki dei u MP ka Shillong Ma Vincent H Pala, u MP ka Tripura u Dr R Roy, u MP ka Assam H.Bey bad u MP ka Mizoram u C Lalrosanga.
Kat kum ka shithi kaba la phah da kine ki MP, ki la pynapw ba ka surok bah NH-6 ka la sniew sha ba palat pud bad ka la pynthud ïa ka leit ka wan jong ki paidbah ka thaiñ bad ka la buh ruh ha ka jingma bad ka jingbym shngaiñ ha ka leit ka wan.
“Ka jingsniew shaba palat pud jong katei ka surok bah ka la buh ha ka jingsngewkhia kaba khraw ïa ki paidbah kiba shong basah ha katei ka thaiñ bad ïa ki nongleit nongwan kiba ïaid na kane ka surok.Watla ka long ka surok kaba kongsan bha kaba pynïasoh ïa kitei ki jylla, ym shym la ïohi ban don kano kano ka jingmaramot ne ban shna pynbha ïa kane ka surok ha u snem uba la leit, kaba la lam sha ka jingeh kaba khraw kaba kynthup ïa ka jingbam por bun bha jong ka leit ka wan, ka aksiden bad ka jingshah pynthud ha ka kit ka bah ïa ki marbam mardih” la pynpaw ha ka shithi.
Kumta da ka mynsiem kaba sngewkhia shikatdei eh kine ki saw ngut ki MP ki la kyntu jur ïa u Gadkari ba un shim khia ïa kane ka kam bad ban bthah ïa ka tnad jongu ba dei ban maramot noh mardor khnang ba ki paidbah kin lait na ka jingeh kaba khraw kaba buh ruh wat ïa ka jingim briew ha ka jingma haba leit ba wan na katei ka surok namar ka ju twa na ka por sha ka por.