Na u DC ioh jingithuh ki nongïalam ka NRAO&DA, u President ba rim um dei shuh ban kam nongïalam

Nongpoh, Naiwieng 11: Ki nongïalam ba thymmai jong ka Nongpoh Region Auto Owners & Drivers Association (NRAO&DA) bala jied thymmai ha u bnai Nailur hadien ka jingmynthi jong ki nongïalam kiba rim ba kim shym la khot jingïalang ne pynthymmai ïaki nongkitkam la kumba 14 snem eiei, mynta ka sngi kila leit ban ïakynduh syndon ïa u Deputy Commissioner ka Ri-Bhoi District ban ioh ka jingithuh naka sorkar hadien ba kila dep ban pynbiang lut ïaki kot ki sla bad ki jingdonkam baroh jong ka Association.
Ha katei ka juh ka sngi naka liang ka Association kum ka jinghikai bad tehlakam ïaka jingbret pathar ïaki jaboh jabaiñ kala leit ruh ban aiti da ki dustbin sha ka Shnong Nongpoh bala leit ruh ban buh haki rud surok bad aiti sha ki dukan ba kin ioh ban pyndonkam bad kiar naka jingbret pathar ïaki jaboh jabaiñ.
Haba kren sha ki lad pathai khubor naka liang u Bah Bah Banasar Lyngdoh Nonglait President ka NRAO&DA, Bah Tony Shylla Vice President bad u Bah Elianby Tynsong Education Secretary kila pynpaw ka jingsngewkmen kaba khraw ba naka liang u DC ka Ri-Bhoi u la ai ka jingithuh ïaki nongïalam ba thymmai jong ka NRAO&DA bad ai ruh ka jingkhublei halor ka jingla kloi jong u ban ai ka jingïatreilang.
Naka liang ka seng kala maham ruh ïa u President barim jong ka Association u Bah Marcus Marten ba um dei shuh ban kam ïalade kum u President namar ka por jong u bad ki nongïalam barim kala kut noh namar wat hadien ka jingkyrpad jong ki nongñiah auto ban jied pynthymmai, ban pynlong ka jingïalang bad ban pynshai ïaka pisa bala lum ha kine ki phew snem bala leit noh hynrei utei u President barim u la shu sngap mynthi bad haka juh ka por ba um dei shuh ban phah lum khajna naki nongñiah auto bad ban sangeh noh shisyndon namar katei ka jingkhrong pisa ka long beaiñ bad lada un dang bteng ban khrong pisa kum ka Association kin sa leh da kaba tyngeh ban ujor sha ki bor ka aiñ.
Ki tei ki Nongïalam ki la pynpaw ruh ba naka liang ka Association ki long kloi ban ïa trei ryngkat lang ba kino ki tnad jong ka sorkar bad kumjuh bad ki dorbar shnong khnang ba kin lah ban tehlakam ïaki kam sniew bad ha kajuh kapor ki la pynpaw ba kane ka sngi ka long tang ka jingsdang ban pyntyllun ïaki kam jong ka Association bad nangne sha khmat kin sa nangleh shibun ki kam ki ban wan rah ïaka jingmyntoi, kumba u DC u la pynshai shibun ki skhim bad ki jingmyntoi naka bynta ki nongñiah auto.