Na Thangskai sha Lapangap mynta sa ha Shillong, ka jingtreikam ki Pulit ka la nang pawpen ryngkew ba kidei tang ki Khla ïa la ki jong ki briew, katba ki long tang ki Khnai sha ki jaka khappud haba ïakynduh bad kiwei pat ki jaidbynriew ne ki bor jong ka Assam.
Kaba jia mynta ha Shillong pat ha kaba ïadei bad ka jingïaid paidbah ki dkhot ka HITO, ki Pulit ki la kam ba kidon hapdeng 50 ne 60 ngut ki Dkhot ka HITO. Hato tang katne ngut ki Samla ki Pulit ki hap ba pyndokam da ki tear Gas ne da ki bom Stun Grenade?. Ki Pulit kiba la ioh training kim lah seh ban teh lakam tang ïa kine ki 50 ne 60 ngut?. Ban dei lei kum ki jingjia ba mih ka jingïapher jaidbynriew ne ki riot ne ki communal clash, ym tip shuh kumno ki Pulit Meghalaya kin leh.
La ïoh ruh ba ha kane ka jingïakhun bad ki HITO, don ki Pulit kiba la pyndonkam bakla ïa ka bor jong ki, kumba la ïohi ha ki Video ba uwei u Pulit teh jaiïong, u la rung ha kawei ka dukan sha bad ja ban kawang da u Stun Grenade. Kumno une u Pulit um tip seh ba kane ka kadei jaka bam jong ki briew, ha kaba ki don ki trai dukan, ki nongtrei bad ki nongbam. Ka Video kaba la saphriang ka pyni ba ha kane ka dukan ki bun bha ki briew kiba ïa ïeng laiñ ban ap bam. Nalorkata ka khapngiah bha. Kham pher wat lada napdeng kine kiba ap bam ki lah ban dei ki dkhot ka HITo. Hynrei kam dei pat ïa u Pulit ban leh kumne. Kiba kum kine ki jait bom kidei tang ban pynpra ïa ki paidbah kiba ïalum ha surok ne ha ki jaka ba heh ym dei ha kamra kiba rit.
Kane ka pyni ïa ka jinglong thurmur ki Pulit ki bym salia don mano ha kane ka dukan. Don khunling khynnah ne ym don, une u Pulit u leh ha la ka mon tang ban pynhun ïa ka kti la jong.
Ha kaba iadei bad ka jingjia ha Thangskai bad ha Lapangap, hadien ba la mih ki khubor jong kine ki artylli ki jingjia, ki paidbah ki la pynpaw ka jingbitar ïa ka jingleh ki Pulit ka jylla, namar ha ka jingjia kaba la jia ha Thangskai ha ka por ba pynlong ïa ka Public Hearing jong ka Meghalaya Cements Limited lane ka dewbilat Topcem, ka la paw shai ïa ka jingleh donbor ki Pulit kiba la shu bom shu tied ïa ki paidbah kiba la mih ban pyrshah ïa ka jingleh sop sop ki bor synshar District bad ka MSPCB, ha kaba ki la shna ïa ka Dara ban pynlong ha kawei ka jaka bad pyntip ruh ba ka Public Hearing ka khlem long shuh, katba ki la pynlong pat ha poh Compound jong ka MCL.
Ka jingpynlong ïa ka Public Hearing ha ka jaka jong ka MCL ka la kdew shai ba kane ka jingpynsngew paidbah kadei kaba la noh shiliang lypa, namar kam lah ban long ba ha ka jingpynsngew paidbah yn leit ban pynlong ha ka liang kaba dei ban shah bishar ne ban shah pynsngew.
Kawei pat ka long ba ha ki Public Hearing kiba kum kine hi dei ban shah lang ïa baroh arliang ne ban ailad lang ïa kiba kyrshan bad kiba pyrshah ruh. Kata kadei ka jingmut jong ka Public Hearing. Lada ka jingpynsngew paidbah ka shim tang na ka jingpynpaw ka liang kaba kyrshan, ka mut kam don jingmut eiei kata ka Public Hearing, kadei tang ka jingpyndep rukom. Ha ki snem kiba ladep, ha ka por ba ka don ka Public Hearing halor ka jingtih Uranium na ki thain Mawthabah- Nongbah Jynrin, ka Public Hearing ka long kaba heh bha bad kat ka jingïapyrshah kaba jur halor ka jingtih Uranium, hynrei ha ka Public Hearing pat ka la ailad lang ïa kiba kyrshan bad kiba pyrshah ruh kumjuh, ym don kano kano ka jingkhang.
Kaba lyngngoh ka long pat balei ba ha kine ki Public Hearing kiba ïadei bad ki Cements Company bunsien ym ju ailad ïa kiba pyrshah ban pynpaw ïa ka jingsngew jong ki. Dei na kane ka daw imat ba ka sorkar ka la phah da ki Pulit kiba don da ki phew ngut ryngkat ka kieng atiar bha la kum kito kiba leit ban pahara ne ban tem ïa ka jingïakulmar bad ïakynad ïapher jaidbynriew.
Kawei pat kaba la ïohi na ka jingjia ha Thangskai ka long ba ki Pulit ym tang ba ki la thombor ïa ki paidbah, hynrei don ki Pulit kiba la pyndonkam bakla ïa ka bor jong ki, da kaba ktah kti ban thap, ban kynjat bad kyrdem ïa ki paidbah,. Ym ju don aiñ ba ki Pulit kin ktah kti ïa ki paidbah. Nangta wat ïa ki kynthei kiba ïaid lynti ruh la ïohi ba ki la bom da u lathi. Hato ki Pulit ki ïoh training ha kane ka rukom seh?
Phai pat sha ka jingjia ha Lapangap, ki Pulit ki la pynlehraiñ hu suiñ ïa ka jylla, haba ha jaka ba kin ïada kin ïakhun ïa ki Karbi kiba thmu ban wan thombor ha Shnong Lapangap, ki la phet krad bad phet ïam rem la kum kito kiba shah beh ha kaei kaei re kaba i ngiew. Hato kane kadei ka rukom treikam jong ki Pulit ban phet na jaka kaba kidei ban ïada ïa u pud u sam?
