Dhaka, Nailar 08: Hadien 15 snem kynthih ba ka Seng Awami League hapoh ka jingïalam ka Sheikh Hasina ka Bangladesh mynta ka sngi, ka la sdang da ka jingsynshar kaba shipor ne ka Interim Government hapoh ka jingïalam u Muhammad Yusuf, u nongseng ïa ka Grameen Bank, uba la ïoh ruh ïa ka khusnam Nobel Peace Prize ha u snem 2006.
U Yusuf, 84 snem ka rta u la phetrieh sha France namar ka jingshah kthong bad shah kem ha ka sorkar jong ka Hasina bad u la don ha Paris ban shan sumar na ka jingpang jong u.
Hynrei hadien ka jingïakhih paidbah ha kane ka ri,kaba la shim ïa ka jingim jong ki spah ngut ki briew bad wanrah ruh ka jingjot jingpynpra kaba jur, ka Hasina ha ka sngi ba ar, ka la hiar shuki noh bad phet noh ruh na la ka jong ka ri ban wan riehtngen ha India.
U Yunus, u la wanphai kyrkieh mynta ka sngi ha Paris bad la pynsmai ïa u mynta hi ka miet da u President jong ka ri, u Mohammed Shahabuddin.
U Yunus udei uwei na kiba la trei shitom na ka bynta ban kyntiew ïa ka ïoh ka kot ki paidbah lyngba ka Micro Credit Investment haba u la seng ia ka Grameen Bank.
Na ka liang u Myntri Rangbah Duh ka ri India, u Narendra Modi, u la phah ka jinga khublei bad kitbok kitrwiang ïa u Yunus ha ka jingshimti jong u ïa ka jingïalam ban synshar ïa ka Bangladesh.
U Yunus, u la ong ba ka kam kaba hakhmat eh jong u ka long ban wanrah biang ïa ka shongsuk shongsaiñ ha ka ri kaba la khyllem noh ka jingsynshar ha kine ki khyndiat sngi baladep namar ka jingïakhih pyrshah sorkar nyngkong da ki samla pule bad hadien pat da ki paidbah jong ka ri hi baroh kawei.
