Nongstoiñ, Jymmang 21: Ka pung jong u (L) bah Aldius Kharbani kaba la tip kum ka Punglieh kaba don ha ka shnong Sylleiïawkheiñ, ka dei ka pung kaba itynnad bad bna nam tam na baroh ki pung kiba don ha West Khasi Hills bad ka dei ruh ka pung kaba heh bad jrong bha ka lynter. Katei ka pung mynta ka hap ha ka jingpeit bad ka jingsumar jong u bah Tony Lyngkhoi bad kiba haïing hasem jong u (L) bah Aldius.
U nongthoh khubor jong u Mawphor ha ka jingïakynduh ïa ki nongpynïaid jong katei ka pung, ki la ong ba nyngkong eh ha u snem 2004 ki la shna ïa katei ka pung ban ri dohkha na ka bynta ban khwai ïalade, hynrei namar ba ka jaka ka dei kaba itynnad suki suki ki la pyrshang ban pynitynnad, khnang ba ki briew na ki shnong ba marjan kin wan jngohkai bad wan ïaid pyngngad bad pyrshang ruh ban pynlong kum ka Tourist Spot.
Na ka por sha ka por ki la pyrshang ruh ban nang pynbha pynheh bad pynitynnad shuh shuh ïa katei ka pung baroh sawdong, da kaba shna ïa ki jaka shongkai, ki jaka ïalehkai jong ki khynnah da kaba thung ruh da ki dieng sawdong ïa katei ka pung.
Ha kaba ïadei bad ki lad jingïarap na ka sorkar ki la ong ba haduh mynta kim pat ïoh jingïarap ei ei. Toi ki la pyrshang katba lah ban leit ïakynduh ïa ki ophisar sorkar ba kin thaw lad lem ban ai jingïarap hynrei haduh mynta ym pat sngewthuh sngew thaw shano kata ka kam jingïarap kan poi.
Halor ki jingpynlut pynsep ban pynitynnad ïa ki sawdong sawkun jong katei ka pung, ki la ong ba ym lah shuh ban tip, namar ki la buh ru ïa ki motor boat kumba hynñiew tylli bad ka dor jong kitei ki motor boat ruh ka long kaba rem bha namar hap ban leit kit naduh Guwahati.
Nalor kata ki la ong ruh ba la kumba ar snem tam ki nongwan jngohkai na kylleng ki jaka, ki la wan man ka por bad na ka bynta ka jinglut jingsep ha kaba pynbha ïa katei ka pung ki hap ban shim da ka bai rung kumba 20 tyngka shi khlieh briew.
Ki la ong ruh ba wat la ki la pyrshang ban leh kumta ruh ym pat lah ban pynmih ïa ka jinglut jingsep ha kaba pynitynnad ïa ki sawdong sawkun jong katei ka pung kat haduh ban khring shuh shuh ïa ki nongwan jngohkai.
Kaba kham sngew tynnad ka long ba ki nongpynïaid jong katei ka pung ki la kyntu ïa ki samla kiba la nang la stad, ba kim dei eh ban ap khmih lynti tang ïa ki kam sorkar. Hynrei, kin pyrshang ban ïeng ha la ki jong ki kjat khamtam kito kiba don bun ki jaka kiba biang, ban buh ïa kino kino ki projek kiba lait na ka jingpynjaboh ïa ka lyer bad ka mariang.
