Nongstoiñ, Nailar 9: Napdeng ki shnong ki thaw baroh kiba don hapoh u pud u sam jong ka ri Khasi Jaiñtia, ki don mynta 61 tylli ki shnong hapoh West Khasi Hills District kiba hap hapoh ka jingpeit jingkhmih jong ar ngut ki Syiem kata ha u Syiem ka hima Rambrai syiemship bad u Syiem jong ka Myrïaw Syiemship.
U bah P.S.Lyngdoh u dkhot barim jong ka Executive Dorbar jong ka hima Myrïaw haba ïakren bad u nongthoh khubor, u la ong ba katkum ki jingthoh jingtar kiba don ha ka ophis jong ka hima Myrïaw, la ong ba mynshuwa eh ki don tang hynñiew tylli ki shnong kiba ki Syiem jong ki ar hima ki la ïakut ban synshar lang bad ïa baroh ki jaka ki puta bad ka khyndew ka shyiap la khot da ka joint property.
U la ong ruh ba haba kitei ki hynñew tylli ki shnong haba ki jied rangbah shnong, ïa ka Sanad ne ka syrnod ki hap ban pah mynjur lang ha baroh ar ngut ki Syiem. Nalor kata u la ong ruh ba hadien bun bun phew snem, ka jingdon briew ka la nang kiew bad ki shnong ruh ki la nang bun haduh ba mynta ki la don haduh 61 tylli ki shnong kiba hap ha ka joint property kiba la peit la khmih lang da ki ar Syiem.
Namar ka jingnang kiew jong ka jingdon briew bad ka jingdon jong ki shnong, u bah Lyngdoh u la ong ba ka por ka la dei ba ki sordar bad ki riew rangbah jong ki hynriew phew wei tylli ki shnong kin pynkynmaw biang ha ka Executive Dorbar jong ka hima Myrïaw, ïa kawei ka mat kaba u la pynsngew ha ki snem ba mynshuwa, ba ka la donkam ba kitei ki hynriew phew wei tylli ki shnong kin don noh tang ha kawei ka hima, kata lada ki don ha ka hima Rambrai ruh kam pher lada kin don ha ka hima Myrïw ruh kam pher. Tangba ki dei ban dei beit ki khun ki raïot tang jong kawei ka hima ym shuh ar hima kumba ki ju long.
Nalor kata u la ong ruh ba kawei pat ka mat kaba u la rah ha ka Executive Dorbar ka long ba lada ki ar Syiem kim kwah ban mynjur ïa kata, ki dei ban pyllait noh ïa kitei ki hynriew phew wei tylli ki shnong na baroh ar Syiem, ba kin ai noh la ka jong ka hima sirdar ship ne Lyngdohship kaba thymmai, khnang ba kin jied hi ïa ka Headquarter jong ka hima bad ban jied hi ïa u nongsynshar, ban pynïaid noh hi ïa baroh ki kam ha kaba ïadei bad ka synshr hima ka synshar shnong synshar thaw bad kiwei kiwei ki jingdon kam.
U la ong ruh ba ha ka por ba u la rah ïa katei ka mat na ka liang u Syiem bad baroh ki dkhot jongka Executive Dorbar ki la shimkhia bad ki la mynjur ban ïakren sani bha ïa katei ka mat. U la ong ruh ba la pyrshang ruh ban pynsngew ha baroh ki sordar bad ki paitbah jong ki hynriew phew wei tylli ki shnong, ki don tang khatsaw ngut ki rangbah shnong ki bym treh ban mynjur ïa kata wat la ki paitbah nongshong shnong ki kwah bad ki sngew tynnad bha ban don tang ha kawei ka hima ne ban ïoh la ka jong ka hima ba thymmai.
U la ong ruh ba hadien ba ki nongsynshar jong ka hima Myrïaw ki la wan uwei hadien uwei pat bad la pynthymmai ruh ki dkhot ka Executive Dorbar, katei ka mat ba u la rah ban ïakren sani na ka bynta ka jingbha bad ka jingsuk ki paitbah ka la shu kut bad jah rngai, namar ma u ruh u la shah weng na ka jinglong dkhot ha ka Executive Dorbar jong ka hima.
