Na ki 3 hajar tylli ki skul, kumba 2 hajar tylli ki skul shnong bad SSA ki la ai NOC ban pynïaid noh da ka sorkar

Shillong, Ïaïong 21: Palat 2000 tylli ki skul SSA na ki 3000 tylli kiba pynïaid da ki Shnong, ki la ai ïa ka No-Objection Certificate (NOC) ban aiti noh ïa ka bor pynïaid sha ka Tnad pule puthi ka Sorkar jylla.
Ïa kane la pyntip da u President ka Meghalaya SSA School Association Bah Aristotle C Rymbai hadien ka jingïalang ba la pynïaid da u Commissioner & Secretary ba khmih ïa ka Tnad Education u Vijay Kumar Mantri ha ryngkat bad ki DSEO, SDSEO bad lai tylli ki Seng Nonghikai ba kynthup All Meghalaya SSA School Teachers’ Association (AMSSASTA) bad ka Meghalaya Fourth Teachers’ Association (MFTA).
Haba kren sha ki lad pathai khubor, u la ong, “Mynta ka sngi, u Commissioner & Secretary ula ai ïa ka jingkheiñ ba ïadei bad ka jingïoh lum ïa ki NoC na ki skul Shnong halor ka jinglong ba kloi jong ki ban aiti noh ïa ka bor pynïaid na ka SSA sha ka tnad pule puthi. Na ki 3000 tam ki skul shnong ha Jylla, ki la ïohpdiang haduh 2000 tam ki NoC.”
“23 tylli ki skul shimet na East Khasi Hills kila aiti ïa ka NOC ba kloi ban aiti noh ïa ka bor pynïaid na ka SSA sha ka Tnad pule puthi,” bynrap u Bah Rymbai.
U Bah Rymbai ula ïathuh ruh ba ka jingïalang ka la ïakren bniah ruh halor ka jingbym long ryntih ha ka jingai ïa ka jingpynbna sha ki SMC ba ïadei bad ka jingai NOC ba ki kloi ban aiti noh ïa ka bor pynïaid sha ka Tnad pule puthi.
U la ong, “Hadien ka jingiakren kaba sani bha, ngi la ïashim railang ba kin sa ai biang ïa ka jingpyntip sha baroh ki SMC ki bym pat shym la ai NoC ha ryngkat ka jingpynshai kaba shai bha halor kane ka sienjam ba la shim da ka Tnad pule puthi ban pan ïa ka jinglong kloi jong ki ban aiti ïa ka bor pynïaid sha ka Tnad.”
Nalor kane, u Bah Aristotle u la pyntip ruh ba ka jingïalang ka la ïakren ruh halor ka jingpynbeit ryntih ïa ki Nonghikai SSA bad ka Sorkar.
U la bynrap ruh da kaba ong, “Naduh u Naiwieng 2024, ngi la ïakren ïa kane ka mat bad ka Tnad pule puthi bad ka la ïaid la jan hynriew bnai mynta bad hynne ka sngi hadien ba ngi la ïakren sani bha, ngi la shim ïa ka rai ba hashuwa ban kut u Jymmang, dei ban pyndep noh ïa baroh ki kam ki jam ban pynbeit ryntih ïa ki nonghikai.”
“Ngi la rai ba kane ka jingpynbeit ryntih yn leh ha ki lai bynta,” ula bynrap.