Nongstoiñ, Naiwieng 18: Ha kane ka juk ki kor ki bor Computer, shibun ki jingsniew ki la wanrah ha ka imlang sahlang. Hynrei haba nang ban pyndonkam ha ka lynti kaba dei pat, ka long pynban ka jingmyntoi bad ka jingkyrkhu kaba khraw ïa uta u ba pyndonkam hok.
Napdeng kiba bun lehse kiba jied ha ka lynti kaba dei bad bym dei lyngba ka jingpyndonkam ïa ki bor Internet, u samla Michael Nongrum ba shong ba sah ha dong Spengthawlangmlah jong ka shnong New Nongstoiñ, West Khasi Hills, u la long ka nuksa kaba bha ba kiwei pat ki para samla kynthei bad shyrnang ba kin bud ha ka lynti kaba dei khamtam ban pyndonkam ïa ka sap kaba ki don da kaba peit aiu ka juk stad Computer ka don ban ai na bynta jong ki.
U samla Michael Nongrum 36 snem ka karta, ha ka jingïakynduh bad u nongthoh khubor, u la pynpaw ïa ka jinglah jong u ban shna pynwandur ïa ki dieng tynrai ban shna jingshna bun jait bun rukom, kata ïa kito ki jait dieng kiba ki briew bun kim lah ne kim sngew donkam shuh.
Haba u ïohlad bad ïohi ïa kiba kum kitei ki dieng kiba long ban shna tiar, u shim bad rah sha la ïing bad u la shna da kaba pyndonkam da ka Epoxy Resin ban shna ïa ki miej bam ja bad kiwei kiwei ki tiar kiba itynnad da kaba u la khmih pyrthuh bud lyngba ka jingpeit na ki YouTube.
Une u samla u ba dei ruh u dei ruh u Doctor Ayurvedic u khun jong ka kong Anjana Nongrum, u la ïathuh ruh ba dei naduh u snem 2016, haba u la ïohi lyngba ka Youtube, u la shoh biej bad itynnad ïa ka jingleh ki nongwei ha ka rukom pyndonkam ïa ki dieng ohshrong bad pynwan dur ïa ki tiar ki tar ha la ki dur bad ki rukom shna.
U la ong ba u la shu mutdur halade tang ban shu pyrshang bad u la sdang ban pynwandur ban shna kawei ka miej tang na ka bynta ïalade. Hynrei suki pa suki haba ki lok ki jor ki la ïohi halor ki jingtrei jong u ki la itynnad bad ki la phah shna lang.
Haduh kine ki sngi kiba bun ki riew paidbah kiba ïohi ïa kine ki jingtrei jong u, kim lah khlem da pyrto bad ong ruh ba u da don shisha ka sap ban shna jingshna da ki dieng. Katba na ka liang u samla Michael Nongrum u la ong ba kaba pynlong ïa u ban leh ïa katei ka kam, ka dei tang ka jingsyngew tynnad ym kano kano da kumwei pat.
Pynban suki pa suki katba ka por ka nang ïaid bad hadien ba ki ba haïing bad ki lok ki jor ki la itynnad, kumta ki la ai mynsiem bad dei kane kaba la pynlong ïa u ban dang bteng ban ïai shna bad u la pynlong ruh da ka jingpyni nam ne exhibition ha sor Shillong ha ki por ba la dep.
Une u samla rangba u la pynpaw ba mynta ka kynti un pynlong pat sa ha sor Nongstoiñ, namar u dei u nongshong shnong na Nongstoiñ. Katei ka exhibition kan long ha ka 21 tarik u Naiwieng 2024 ha IB ka PWD ha ka por mynstep haduh 6 baje janmiet.
