Na ka WKHDCA State B Chess Championship yn jied ka WKH ïa ki hynriew ngut ban mihkhmat ïa ka District

Nongstoiñ, Naitung 05: Ban sei madan ïa ki samla bad ki rangbah ba dang sap ha ka jingïalehkai Chess, ki bor pynïaid jong ka West Khasi Hills District Chess Association ka la pynkhreh ban pynlong da ka lympung lehkai Chess kaba khyndai, ïa kaba la ju pynlong barabor man u snem, kaba la tip da ka WKHDCA State B Chess Championship cum Inter Schools Chess Championship 2023.
Ka jingthmu jong kane ka lympung, ka long ban sei madan ïa ki samla kiba don sap ha kane ka jait jingïalehkai bad kaba kongsan ka long ban jied napdeng ki nongïalehkai na ka thup ‘Open to All’ ki ban mihkhmat ïa ka District sha ki kyrdan ïakhun ba kham sha jrong, kata ha ka State Level.
Katkum ka kyrwoh kaba la pyllait da ka West Khasi Hills District Chess Association, ïa kane ka lympung lehkai la bynta ha ki kyrdan ïakhun bapher bapher, kiba kynthup ïa ki nongïalehkai ba dang hap hapoh ka 12 snem ka rta, 15 snem bad hapoh ka 18 snem, bad la ïoh jingtip ruh ba na ka liang jong ka seng ka la pynkhreh ban plie pyrda ïa ka jinglehkai naduh ka 8 tarik mynta u Naitung bad ka por kan long 9.30 myntsep.
Ka jaka ban pynlehkai kan long hapoh ka SGRY Hall C&RD Block, ha Nongstoin.
ïa kane ka lympung championship kan long naka bynta ki paitbah bad ki Khynnah skul jong ka thaiñ West Khasi Hills District.
Shuh shuh, na ka liang jong ki nongpynïaid ki la pynbna ba yn sam khusnam Momento ryngkat ruh bad ki
Certificate ia baroh ki nongjop ha ki kyrdan bapher bapher.
Katba ha ka kyrdan lehkai bym shym la kynthup rta ka seng kan sa ïoh ban jied ïa ki 6 ngut kiba ha khmat duh
na ka bynta ban leit mihkhmat ïa ka District ha rynsan lehkai Meghalaya State Level ka ban long ha Ribhoi
District, ïa ka ban sdang naduh ka 14 bad 15 mynta u bnai.
Kiba kwah ban shim bynta kin phone lane Message ha U Secretary, i Bah Bonney Kharbani (8258898775) bad President, i Bah Richard Sun (7005842605).