Na ka UNNATI skhim la ïoh ban pdiang 101 tylli ki shithi kiba kwah ban sengkam: Director DPIIT

Shillong, Naitung 03: Ka tnad ban kyntiew ïa ki kam karkhana bad khaïi pateng jong ka sorkar pdeng kaba la tip kum ka ‘Department for promotion of Industry and Internal Trade (DPIIT) ka la dep ban pynlong ïa ka jingïalang jong ki nongseng kam ha Shillong ha ka jingïatreilang bad ka tnad khaïi pateng ka sorkar jylla.
Ïa kane ka jingïalang la dep ban pynlong da ka jingthmu ban pyntip paidbah ïa ka ‘Uttar Poorva Transformation Industrialisation Scheme 2024’ kane ka long ban khring ïa ki nongwan seng kam ha Meghalaya.
Kane ka long ban pynïakynduh ïa ki nongseng kam la jong, ki briew jong ka sorkar bad kiba don bynta lang ha kane ka kam ban khring ïa ki nongbei pisa ban seng kam ban ïakynduh ban sngewthuh ïa ki jait kam aïu kaba ki kwah ban wan seng.
U Anindya Bhattacharya Director ka DPIIT la ong ba ka long kaei kaei kaba sngewtynnad ba na ka UNNATI skhim la ïoh ban pdiang 101 tylli ki aplikeshon kiba kwah ban seng kam nalor kitei ki dang don sa 73 tylli kaba ki dang bishar bniah mynta.
Kiba bun ma kiba kwah ban bei pisa sha kane ka jylla ban seng kam ka long ha ka tnad jngohkai pyrthei bad ki jingtrei kaba ïadei bad ki kam ha ki kam shang shuwari kane ka bynta ka jylla Meghalaya ka la khring ïa ki nongwan seng kam.
Kane ka jingpynlong ïa ka jingkynduh lang hapdeng ki nongwan bei pisa ban seng kam, ki bor sorkar bad kiba don ïa ki lad treikam ka long ba kila ïoh ban ïakren markhmat bad kane kala pynhun ïa kiba kwah ban wan seng kam ha kane ka jylla.
Ka jingïakren ka long ba kumno kin register, kiei ki kyndon kaba ki hap ban bud, ki kot ki sla kiba donkam, kiwei ki jingmyntoi ba kin ïoh bad kiei ki lad jingïarap ban pynkloi ïa ka kam.