Shillong, Nailar, 18: U Bah Samborlang Diengdoh uwei na ki riewrangbah ha ka Sngi Palei u la pynbna paidbah ba un sa pynïasoh ïalade bad ka Trinamool Congress ban aireng ha ka Elekshon sha ka Iingdorbar Thawaiñ ka Jylla ka ban sa long ha u snem 2023 pyrshah ïa u MLA ka Pynthorumkhrah Constituency u Bah Alexander L. Hek.
Ha ka jingïakren bad ki lad pathai khubor, u Bah Samborlang u la ong hadien ba u la bishar sani bha na baroh ki seng saiñpyrthei u la sngewdei ban rung noh sha TMC kaba dang ka seng saiñpyrthei kaba thymmai bad ka bym pat don dak sniew eiei ha kane ka jylla Meghalaya.
U la pynbna ba un sa pynïasoh bad kane ka seng saiñpyrthei ha ka 20 tarik mynta u bnai.
U la ïathuh ba ka jingjied jong u ïa ka Trinamool Congress ka long ba um lah ban ïadon lang bad ki Seng Saiñpyrthei kiba la don ha ka Sorkar bad u la bynrap ruh ba ka daw ka long ba ka TMC ka dei ka Seng Saiñpyrthei kaba don ha ka Liang Pyrshah bad dei na kata ka daw ba u hap ban ïaid sha kata ka bynta.
U la ong ba ïa mynta um pat pynïasoh bad ka TMC hynrei yn sa pynïasoh ha kine ki khyndiat sngi ban sa wan bad kane ka rai ka long katkum ka jingshem jong ka kynhun ka jong u namarba hapoh ka Pynthorumkhrah Constituency ka dang don shibun ki jingeh kaba ki paidbah ki ïakynduh.
Shuh shuh u la ong, kumba ka long mynta ym don ba kren ïa ka jingkiew dor jong ki marbam, ki paidbah ki hap ban siew ïa ka khajna la ka long ha kano kano ka rukom.
U la ai nuksa ba lada thied tang ïa ka jingpruid ruh ki paidbah ki siew ïa ka khajna bad wat ïa u khaw ruh la pynngat ha ka Goods and Services Tax (GST).
“Ïa kane ka jingeh jong ki paidbah yn sa lah ban weng lyngba ka Trinamool Congress,” u la ong.
