Na ka Skul ba tang 2 ki samla pule sha ka College of Nursing plie ka Dr H.Gordon Robert Hospital
Shillong, Nailar 8 : Na ka School of Nursing kaba don tang arngut ki samla pule la kyntiew kyrdan ka Dr H Gordon Roberts Hospital sha ka Nursing College,ong u Myntri Rangbah ka jylla u Conrad K Sangma haba plie ïa kane ka Nursing College mynta ka sngi ha katei ka hospital.
Ha kane ka sngi ba plie ïa kane ka college la ïadon lang ruh u myntri ka tnad pule puthi u ma Lahkmen Rymbui.
Haba kren ha ka jingïalang u Myntri Rangbah u la ong “ Lyngba kine ki snem kane ka hospital ka la mad ïa ki jingeh ba har rukom hynrei ka la ïai jop ïa kawei hadien kawei namar ka don ka thong bad kata ka long ban shakri ïa ki para briew. Ka Hospital, ki nongtrei , ki doktor bad ki nonghikai ki la ïaid bun ki dieng pyngkiang hynrei ki la ïai jop beit ïaki bad ka long kaei kaei kaba sngewtynnad tam ba ïa kane ka College of Nursing jongka Dr H Gordon Robert Hospital la ïoh ban plie mynta u snem uba dei u snem ba rakhe ïa lyngkhuh bad ka jingdap 50 snem ka jylla”.
U la ong shuh shuh ba ka long kaba kongsan tam ban ïohi ba ka hospital bad kane ka College kan sei ïa ki Nurse kiba ai ka jingshakri hok ïa ki briew da ka mynsiem kaba sngewrit. Da ka jingïai kyrshan bad ïalam jongka Balang Presbyterian kane ka College khlem pep kan sei ïaki nurse kiba ym tang ban pyllait im ïa ki mynsiem briew hynrei ki ban ïai sah kynmaw ha ka jingim ki para briew.
U Myntri Rangbah ula ong shuh shuh ba ka long kaba donkam ban don kum kine ki tnad pule ha ka jylla khnang ba ki samla kin ïoh ban phai khmat sha ki. “ Ngi don bun ki khun samla kiba ym ïoh kam ïoh jam bad ka don ka jingkyrmen ba ha ki khyndiat snem ban wan kin ïoh ban rung kam wat shaduh Japan bad Thainland kiba dang duna bha ki nurse. U la ong ba ka Dr H Gordon Roberts Hospital College of Nursing kan plie lad plie lynti ïa ki khun samla tangba u la ban jur ba ka rukom ai jinghikai ka dei ban ïa ryngkat bad ki college bar ri. “ Ngai ai jingmut ba ka College kan don ki subjek kiba ïadei bad ki nong Japan bad Thailad khnang ba kin tip ym tang ïa ka rukom im jong ki briew hynrei wat ban nang ban kren ïaka ktien ka thylliej ruh ban suk lada jia ba ki ïoh kam sha kitei ki ri. U la kular ba ka sorkar kan ai kino kino ki jingïarap sha ka hospital bad college ha kino kino ki bynta ba ki donkam ha kane ka jingshakri ïa ki para briew.