Na ka rynsan Sur Kynud plie lad ka DBMNTv ïa ki samla ban paw ha ki lympung ka pyrthei

Shillong,Nohprah 09 : Da ka thong ban plie lad ïa ki samla kumjuh ïa ki heprit ba dang khie ba kin ïoh lad ïa ka kabu ksiar ban shim bynta haki lympung ïakob ha ki ri ka pyrthei, na ka liang ka Don Bosco Media Network (DBMNTv) ha ka sngi Nyngkong ka la pynbna ba kin sdang biang ïa kane ka lympung ha ka sien kaba lai ïa kaba la tip kum ka Sur Kynud Season-3.
Ha kane ka rynsan ïakob rwai, kiba khur ïa ka khunsam lahduh kin ïoh ïa ka song pisa kaba haduh 1lak tyngka ryngkat ka kabu ksiar ba kin ïoh banleit shim bynta pat ha kiwei ki lympung ïakob ba pawnam ha India bad wat shaduh bar ri ruh.
Katkum ka jingïathuh da u Fr. Michael Makri, Director ka Don Bosco Media Network, u la pynkynmaw ba kumno ha kaba sdang nyngkong ki la sdang shwa da ka Sur Kynud ki Khynnah Rit, bad kaba sngewtynnad ka long ab uwei na ki heprit ba dang 7 snem ka rta u la ïoh ïa ka jingkyrshan skul ei na ka DBMNTv kaba haduh shisnem kynthih .
La ïathuh ba ka samla Chevinia kaba long ka lahduh ha ka Sur Kynud Season 1, nalor ka 1lak tyngka ba ka ïoh, ka la ïoh ruh ïa ka kabu ksiar ban leit shim bynta bad mihkhmat ïa ka Jylla ha ka Vocal Star UK bad khur ïa ka nam lahduh ha katei ka snem.
Nangta ka lahduh ha ka samoi kaba ar, ka samla Ellery Kharkongor ka la ïoh ban pdiang markhmat ïa ka khusnam lahduh na kti u Myntri Rangbah ka Jylla, Conrad K Sangma hadien ba ka la long ka nongjop napdeng ki 50 ngut ki nongrwai kiba kynsai. Nalorkata, ka la ïoh ruh ban leit shim bynta ha ka The Voice USA.
Kumta, na ka liang u Fr. Michael Makri u la pyntip ruh ba ha ka Grand Finale kaban long ha ka 31tarik Nohprah 2025, ki khmih lynti ba kan long kaba shongkun bad shongshit bha namar kin ïoh ban sakhi ïa ka jingtbit bad ka sur ba syiang na ki heprit, ki samla bad ruh ki rangbah kiba don ïa ka sap rwai kaba la ai kyrpang.
Na ka liang ki bor pynïaid ki la pyntip ruh ba shen kin sa pyntip paidbah ïa ka tarik ba kin sdang noh ïa ka jingpdiang ïa ki nongshim bynta bad kito kiba shah jied kin ïoh pat ïa ka jingpyntbit na ki nonghikai kiba ka DMBNTv ki la buh kyrpang ban pyntbit ïa ki tad haduh ba kin da poi sha ka kylla kaba khatduh.
Ïa ki jingtip kiba bniah ki paidbah ki lah ruh ban peit lyngba ka website jong ka Don Bosco Media Network – www.realkasurkynud.com bad ruh ha ki rynsan social media.