Na ka President ka ri dawa ka NEHUTA ban bthah ïa u VC ka NEHU ban weng ïa ka hukum ba la pynmih

Shillong, Nailur 12 : Ka kynhun ki nonghikai ha skulbah NEHU hapoh ka lama jong ka North Eastern Hill University ha ka sngi Ba-ar ki la kyntu ïa ka President jong ka Ri, ka Droupadi Murmu ba kan bthah ïa u Vice Chancellor ka NEHU u Prof PS Shukla ban weng noh mardor ïa ka notification kaba 12tarik Naitung, kaba bthah ïa ki college ba pynïasoh ba kin pyntreikam noh ïa ka National Education Policy (NEP) khlem ka jingmynjur jong ka Academic Council.
Na ka liang u President ka NEHUTA, Prof Lakhon Kma u la ong, “Halor ka jingpynkheiñ da u Prof PS Shukla (ïa ka NEHU Acts bad kiwei) kum u Vice Chancellor ka NEHU Shillong, ngi kyrpad ïa phi ba kum ka Visitor jong kaNEHU ban tuklkar bad bthah ïa u ban weng noh ïa ka shithi kaba 12tarik Naitung, 2023 kaba la phah sha baroh ki principal jong ki jaka pule ba pynïasoh bad ka skulbah kaba long kyrkieh, kaba leh khlem da dei rukom, ha shwa ba kan wanrah shuh shuh ka jingma ïa ka NEHU.”
Shuh shuh la kyntu ruh ïa ka President ba kan pynmih ka jingbthah ban khanglad ïa u ban treikam ha ka rukom kaba long leh donbor da kaba pyndonkam bakla ïa ka bor jon gu kum u Vice Chancellor, ban ïada ïa ka NEHU bad ka bor jong ka kum ka Academic Council na ka jingpynkhein ïa ki kyndon bad ka burom jong ka skulbah, ki jaka pule ba pynïasoh sha ka bad ruh ki samla pule kiba bun ki dei ki riewlum bad khamtam na bynta ka bha ka miat jong ki nongshong shnong ka Meghalaya.
Na ka liang u Prof Kma u la on gruh ba u VC u la pyrshang ban pyntreikam ïa ka NEP ha ki Undeer Graduate level ha ki college ba pynïasoh bad ka NEHU naduh ka samoi 2023-2024 kata naduh ka 1tarik Nailar 2023 da kaba bthah ïa ki principal jong ki college ba pynïasoh sha ka NEHU khlem ka jingmynjur jong ka Academic Council jong ka NEHU.
Katkum ki kyndon jong ka NEHU, ka Academic Council kadei ka bor kaba hakhliehduh kaba rai ïa ki polisi treikam jong katei ka skulbah.