Shillong, Jymmang : U MLA ka Mawlai u Bah PT Sawkmie ha kane ka sngi Saitjaiñ ba la lah u la leit ban plie ïa ka lynti surok dewbilat ha dong Tariang A kaba hap hapoh ka shnong Mawiong Umjapung, kaba mynshuwa kane ka lynti ïaid ka dang long khlaw bad kaba la wanrah jingeh shibun ïa ki nongshong shnong kiba dei ban ïaid lyngba jong kane ka lynti.
La ïadonlang u Rangbah Shnong, bah Anthony Kharkongngor, Rangbah Dong bah Batskhem Makdoh, Secy. Bah D.B Shangpliang bad kiba shong ba sah ha kane ka dong Tariang A.
U Bah PT Sawkmie u la pynpaw ka jingkmen haduh katta katta namar na ka liang ki nongshong shnong jong kane ka Tariang A kila ïoh ïa surok dewbilat kaba ula mang 4 lak na ka MLA skhim.
Na ka liang u MLA u la kren ruh shaphang ka 24 klur tyngka ïa ka ba u pyntip ba shen kin sa khot tender noh na ka bynta kane ïa ka ban pynbiang um kor ïing man hapoh ka shnong Mawiong Umjapung.
Ha kajuh ka por u la ïathuh ruh ba shen ka Mawiong Umjapung bad Mawiongrim kan sa ioh um kor ïing man ki thliew ïing lyngba ka Jal Jeevan Mission bad kane kan urlong ynda la lah ban pyntreikam pura ïa ka Mahatma Gandhi National Rural Employ ment Guarantee Act 2005 (MGNREGA) .
La ïoh ruh ïa ka jingkren na u Rangbah Shnong Bah Anthony uba la ong ba ym i kop satia ba kan mih surok na kane ka khlaw bad ka jaka kaba dap da ahor ktieh ha ki por mynshuwa bad mynta pat la lah ban ïaid kali na kane ka jaka. Kumta u la ai khublei ïa u MLA na ka bynta kane.
Shuh shuh ha kane ka sngi la ïoh ruh ïa ka jingkren na Bah DB Shangpliang bad kumjuh na kiba shong basah ha kane ka dong, kiba la pynpaw ka jingsngewnguh ïa u MLA.
Ha kane ka sngi na ka liang ka dong Tariang A kala ïoh ban sam ruh ïa ka bai skul na ka bynta ki arngut ki samla pule kiba duk, kata u Pynshngaiñ Shianglong bad Donbok Shylla khnang ba kin lah ban bteng ïa ka jingpule ka jong ki.
