Na ka Langpih OP sha ka Community Hall pynkylla syndet ka KHADC ïa ka song tyngka

Nongstoiñ, Naitung, 14: Ka Federation of Khasi Jaiñtia and Garo People (FKJGP) Rimuliang Circle ka dap da ka jingkyndit kaba khraw, haba ïohi ba u Chief Executive member ka Khasi Hills Autonomous District Council u Bah Pynïaid Sing Syiem, u ba la pyntip hapoh ka Ïing Dorbar Thaw aiñ ka KHADC ba ïa ka 30 lak tyngka ba la mang ban shna ïa ka Police Outpost ha Langpih, la pynkylla noh sha ka Community Hall jong ka Dorbar Shnong Nonglang. Kane ka 30 lak tyngka ka long ka bhah ba la mang kyrpang da ka Executive Committee ba la dep, ha ka jingïalam u Bah Titostarwel Chyne kum u CEM ha ki snem ba mynshwa, kaba long ruh kum shi bynta ban theh ïa ki lad jingpynroi ha ki thaiñ khappud ka Meghalaya bad Assam. Ka dei ka sienjam kaba dei eh jong ka KHADC ha kitei ki por, kat haduh ba ka la mang haduh kat katei ka song pisa ïa ka thaiñ Langpih.
Hynrei sngew lyngngoh haduh katta katta, ban ïohi ba kane ka Executive Committee ba mynta, ka la pynkylla noh pynban ïa kane ka song pisa sha kata ka Community Hall jong ka Dorbar Shnong Nonglang, kaba dei ka shnong ka bym shym hap shuh hapoh ka thaiñ border wat la ka dang hap ha kajuh ka Constituency.
“Na ka seng ka da sngew bynñiaw eh haduh katta katta ïa kane ka rai khawpud, ba la shim da kane ka Executive Committee ba thymmai ba la ïalam da u bah Pynïaid Sing Syiem kum u CEM. Ngi pynrem jur ruh ïa kane ka EC ba mynta, kaba pyni ïa ka jinglong bym don jingkitkhlieh ïa ka jingeh ki paidbah ha ki thaiñ khappud khamtam ha Langpih”, ong u Bah Serbilin Lyngdoh President FKJGP Rimuliang Circle.
“Ha kaba ïadei bad ka jingpynshai u CEM halor ka jingpynkylla noh ïa kane ka song jingïarap pisa ïa ka ban tei ïaka Langpih Police Outpost sha ka Community Hall jong ka Dorbar Shong Nonglang, ka long namar ba ka dong ka thaiñ ka long ka bym shongsuk shong saiñ. Kumta kum ka seng da lei lei ngin nym lah ban pdiang ïa kaba kum kane ka jingong”.
“Ka jingpynshai jong u ka la ïalam bakla shibun eh ïa ki 30 ngut ki MDC hapoh ka Ïing Dorbar ha KHADC bad ïa ka jaidbynriew hi baroh kawei. Namar kumba ka long mynta kiwei kiwei ki scheme kiba la ïoh sha ka thaiñ ki ïaid beit shait shait bad kim ju don kino kino ki jingthud. Balei tang kata ka special scheme ka KHADC ym lah ban pyntrei”.
“Ka KHADC ka la dei ban don ruh ïa ka jingpynbeit bad ka tnad kam poh Ïing ka Jylla ban pyntrei ïa kane ka building ba la mang ha Langpih, khnang ba kan ïaid beit ïaid ryntih. Nalor kata lada ka dei ruh ban pynkylla noh sha kata ka Community Hall, balei ka KHADC kan leit rah noh shaduh ka Shnong Nonglang?. Hato ki briew ha ka thaiñ khappud Langpih kim donkam Community Hall shuh seh mo?”.
“Ngi pynrem jur ïa u MDC ka thaiñ u Bajop Pyngrope u ba la don bynta ban pynkylla khongpong wat ïa kiei kiei kiba la long. Ha ka jingshisha shwa ba un leh ïa kane, u la dei ban ïa syllok bad ki nongshong shnong ka thaiñ, la ka long ïa ki Sordar Shnong ne ki riew rangbah ka thaiñ. Hynrei kane ka jingleh jong u khlem da ïa syllok bad ki nongshong shnong, ka pynrit mynsiem bad pynduh jingkyrmen shisha ïa ka dong ka thaiñ hi baroh kawei”.
“Ka seng bad paidbah ngi dawa ba ka KHADC kan nym dei ban pynduh jingkyrmen ïa ka thaiñ da kaba shim noh wat ïa kaba ka la ai. Hynrei, ka la dei ban ai shuh shuh, khnang ba kum ka thaiñ ngin sngew shngaiñ ba ki bor shynshar ba bat ïa ka riti ka dustur ki dang tip ïa la ki jong ki doh ki snam ki ba im jynjar ha ki thaiñ khappud”, ong u Bah Serbilin Lyngdoh President FKJGP Rimuliang Circle.