Shillong, Jylliew, 29: U Babu Kenneth Shadap uba long u nongïalam barim jong ka Meghalaya Upper Primary School Teachers Association (MUPSTA) hadien ba u la shongthait na ka kam nongïalam jong kane ka kynhun u la pynleit jingmut sa ha ka kam ban ïalap ïa ka Ktien jong u Blei ha kylleng ki shnong.
Kum u dkhot ba shitrhem jong ka Balang Katholik uba la ngam jylliew bha halor ka Ktien u Blei naduh ki snem kiba kham mynshwa u la leit sha ki shnong bapher bapher ka jylla ban leit ïalap ïa ka khubor babha jong u Blei.
Ha ka sngi Saitjaiñ u Babu Kenneth u la hiar sha Christ King Parish, Sonapahar, West Khasi Hills District ban ai jingkren ha ka seminar halor ka phang “ka shongkha khleh ka pynsynjor ïa ka jingngeit Khristan.”
Ïa kane ka seminar jong ki samla la pynlong da ka Nongstoiñ Diocese Catholic Youth Movement jong ka Jylla Niam Nongstoiñ ïa kaba la jer kyrteng kum ka 38th Touring Programme kaba la long naduh ka sngi Thohdieng ban sa pynkut ha ka sngi u Blei.
La sakhi ruh da ki spah ngut ki samla jong ka Christ King Parish ki la ïashim bynta shitrhem ha kane ka seminar.
